च्वबु गाःहितिइ उद्धाेषण व वक्तृत्व विकास तालिम क्वचाल
लहनान्युज | तछलाथ्व तृतीया ११३८ ( जुन १६ २०१८ ) |
च्वबु गाःहिति टाेल सुधार समिति मंकाः खलःया ग्वसालय् जूगु छवाःया उद्धाेषण व वक्तृत्व विकास तालिमय् ब्वति कयादीपिन्त दसिपाै लःल्हात ।
ललितपुर महानगरपालिकाया ग्वाहालिइ जूगु तालिमया समापन समाराेहय् ललितपुर महानगरपालिका २४ वडाया अध्यक्ष व सामाजिक विकास समितिया संयाेजक दिनेश कार्कीं दसिपाै लःल्हानादीगु खः ।
मंकाः खलःया नायः दिनेश महर्जनया सभापतित्वय् जूगु ज्याझ्वलय् स्यनामि सुरजवीर बज्राचार्ययात सुभाय् देछासें सम्मान नं याःगु खः ।
पाहाँपिन्त मतिनाया चिं लःल्हायेगु ज्या नं जूगु ज्याझ्वलय् ११ वडाया अध्यक्ष इन्द्रमान महर्जन, मंकाः खलःया पुलांम्ह नायः श्यामकृष्ण महर्जन, सामुदायिक विकास शाखाया अधिकृत सरीता महर्जनं थःगु नुगःखँ तयादीगु खःसा सामुदायिक विकास शाखाया महिला विकास कार्यक्रम संयाेजक ज्ञानीशाेभा महर्जन, वडा सदस्य कृष्ण महर्जनं पाहाँकथं अाशन ग्रहण यानादीगु खः ।
ज्याझ्वलय् तालिमय् ब्वति कयादीपिं प्रशिक्षार्थीपिन्सं तालिम कयाःगुया अनुभव कनादीगु खःसा तालिम कयादीम्ह रिना महर्जनं ज्याझ्वः न्ह्याकादीगु खः ।
Categorized in राष्ट्रिय
