नेपाल संवत्यात राष्ट्रिय संवत् धकाः घोषणा याःसां नं थुकिया सरकारी ज्याखँय् छ्यलाबुलाया सः थ्वय्का वयाच्वंगु नं ताः हे दत ।

नेपाल सरकारं नेपाल संवत् ११४४ सुरु जुइ न्ह्यः कौलागाः त्रयोदशी खुन्हुया मुँज्यां नेपाल सरकारया निर्णय पुस्तिका व सकतां कथंया सरकारी दस्तावेजय् नं नेपाल संवत् छ्यलेगु निर्णय याःगु बुखँ पिहाँ वल । थुकिं नेपाल संवत्या आन्दोलनय् न्ह्यज्यानाच्वंपिं नेवाःतय् दथुइ छगू लसताया सञ्चार यात ।

थुकिं आः पिहाँ वइगु हरेक सरकारी दस्तावेजय् नेपाल संवत्या थाय् हाकनं नं सुनिश्चित जुइ धइगु आशा याय्गु थाय् ब्वलंगु दु । नेपाल संवत् नेपाःया अभिलेखय् न्हापांनिसें हे छ्यलाबुलाय् वयाच्वंगु संवत् खः । राणाकालय् नेपाल संवत् व नेपालभाषायात सरकारी ज्याखँय् छ्यले मदइगु याना बी धुंकुसेंलि नेपाः एकल भाषा व धर्मया नीतिइ न्ह्याः वन । प्रजातन्त्र वलं नं थ्व नीतिइ छुं हे परिवर्तन मवः । पञ्चायतकालय् ला झन् हे भाषिक व सांस्कृतिक दमनया पराकास्थाय् हे थ्यन । अनं लिपा बहुदलीय प्रजातन्त्रं नं भाषिक व सांस्कृतिक नीतिइ खास हे हिउपाः मवः ।

गणतन्त्र नेपाः वय् धुंकाः तिनि नेपालभाषा व नेपाल संवत्पाखे छुं भचा हिउपाः वःगु खनेदु । गणतन्त्र नेपाः वय् धुंकाः जक नेपाल संवत्यात राष्ट्रिय संवत्कथं घोषणा यात सा थुकियात व्यवहारिक छ्यलाया निंतिं नं पहल जूगु खः । लिपांगु इलय् नेपाल सरकारं नेपाल संवत्यात सरकारी दस्तावेज व निर्णयपुस्तिकाय् छ्यलेगु निर्णय यानाः हाकनं नं हिउपाःया सन्देश ब्यूगु दु । भाषिक अधिकार, सांस्कृतिक अधिकारया निंतिं नेपालय् गणतन्त्र वय्धुंकाः जक छुं भचा बांलाःगु लकस ब्वलंगु दु । नेपाल सरकारं व्यवहारिक रुपं नेपाल संवत्या छ्यलाया निंतिं याःगु थ्व निर्णय गुलितक कार्यान्वयन जुइ धइगु नं स्वय्गु ल्यं हे दनि ।

प्रधानमन्त्रीं हे नेपाल संवत्यात आः सरकारी दस्तावेजय् अनिवार्य छ्यलेमाःगु धाय् धुंकाः थुकिया कार्यान्वयन जुइ धइगु भलसा दु । नेपाल संवत्या आन्दोलनय् थ्व छगू तःधंगु उपलब्धी खः । नेपाल संवत्यात जनमानसय् थ्यंकेगु निंतिं सरकारी छ्यलां तःधंगु भूमिका म्हिती । सरकारी ख्यलं थुकिया छ्यला न्ह्याके धुंकाः थुकी ब्वलनाच्वंगु थीथी विवाद समाधानया निंतिं नं लँपु चाला वनी । नेपाल सरकारं नेपाल संवत्यात व्यवहारिक छ्यला न्ह्याकायंकेगु धाय् धुंकाः थुकी खनेदुगु समस्या समाधानया निंतिं शास्त्र सम्मत व विधि सम्मत सहलह ब्याकाः छगू निष्कर्षय् न्ह्यज्याय्गु लँपु चाला वनी ।

नेपाल सरकारं नेपाल संवत्यात राष्ट्रिय संवत् घोषणा याःगु थ्यंमथ्यं झिंन्यादँलिपा व्यवहारिक छ्यलाया निंतिं पहल जूगु दु । थ्व ज्यायात सफल दय्केगु निंतिं नेपाल संवत्या आन्दोलनय् न्ह्यज्यानाच्वंपिसं नं थःगु थासं भूमिका म्हिते आवश्यक जुइ ।