शेयर बजाः थौं सामान्य सुधार जूगु दु।

म्हिगः १० अङ्क स्वया अप्पो घटे जूगु शेयर बजाः परिसूचक नेप्से थौं ३ दशमलव ३३ अङ्कं थहावना १ हजार ८ सय ४१ दशमलव ०४ विन्दुइ थ्यःगु दु।

थौं जीवन विमा समूहया शेयर १ सय २५ अङ्क स्वया अप्पो व विकास बैंक, लघुवित्त, व्यापार, लगानी लगायतया समूहया शेयर सामान्य थहावःगु दु।

ग्लोबल आइएमइ लघुवित्तया शेयर १० प्रतिशतं थहावना सकरात्मक सर्किटय् थ्यःगु दु। समग्र बजाः सुधार जूगु दु सा सिंगटी हाइड्रोया शेयर ९ प्रतिशत स्वया अप्पो कुहावःगु दु।

कारोबार रकम धाःसा म्हिगः स्वया थौं कुहावया १ अर्ब १४ करोड रुपैयाँय् थ्यःगु दु। दकलय् अप्पो रिलायवल नेपाल लाइफ इन्सुरेन्सया ७ करोड ३४ लाख रुपैयाँया शेयर कारोवार जूगु दु।

Categorized in राष्ट्रिय