एकदिवसीय क्रिकेटय् घरेलु टोली दक्षिण अफ्रिकां भारतयात त्याकूगु दु। वंगु चान्ह्य जूगु कासाय् भारत दक्षिण अफ्रिकानाप ८ विकेटं पराजित जूगु दु।

थुगु कासा नापं स्वगु एक दिवसीय शृङ्खला छगु तग त्यानां बराबरी जूगु दु। त्याकेगु निति २ सय १२ रनया लक्ष्य ज्वना वंगु दक्षिण अफ्रिका ४२ ओभर ३ बलय् निगु विकेटय् त्याकूगु खः।

टोनी डी जोर्जी अविजित १ सय १९ रनया शतकीय पारी म्हितूगु खः। रिजा हेन्ड्रिक्सं ५२ रन दयकूगु खः। रास्सी भान डर डुसेन ३६ रनय् आउट जूगु खः। भारतं दक्षिण अफ्रिकायात २ सय १२ रनया लक्ष्य बिःगु खः।

सेन्ट जर्ज पार्कय् टस बूया न्हापां ब्याटिङ याःगु भारत ४६ ओभर २ बलय् २ सय ११ रनय् अलआउट जूगु खः। भारतया साइ सुदर्शनं दकलय् अप्पो ६२ रन दयकूगु खः। लोकेश राहुलं ५६ रन दयकूगु खः।

दक्षिण अफ्रिकाया नान्द्रे बर्गरं स्वंगु विकेट, बेउरान हेन्ड्रिक्स व केशव महाराजं निगु निगु विकेट काःगु खः। मेगु कासा कन्ह्य जुगु दु।

Categorized in कासा