सत्यनारायण बहादुर श्रेष्ठ स्मृति मिडिया कप फुटसल–११४४या च्याम्पियन चित्तवन शाखा
लहनान्युज | थिंलाथ्व पुन्ही ११४४, पुस १० मंगलवाः
नेपाल पत्रकार महासंघया संस्थापक अध्यक्ष सत्यनारायण बहादुरया १०८ दँ बुदिया लसताय् नेवाः पत्रकार राष्ट्रिय दबूया ग्वसालय् सत्यनारायण बहादुर श्रेष्ठ स्मृति मिडिया कप फुटसल–११४४ कासा जूगु दु।
उगु कासाय् नेवाः पत्रकार, आदिवासी जनजाति पत्रकार व नेवाः कलाकारतय् दथुइ जूगु फुटसल जूगु खः। कासाय् नेवाः पत्रकार राष्ट्रिय दबू चितवन शाखा न्हाप, येँ शाखा ल्यू नेवाः कलाकार टिम लियांल्यू लाःगु खः। अथेहे नेवाः मिसा पत्रकार व नेवाः मिसा कलाकार दथुइ जूगु मैत्रीपूर्ण कासाय् पत्रकार टिम त्याःगु दु।
धेंधेंबल्लाःया फाइनलय् चितवन शाखां येँ शाखायात ८–४ गोलं बुकूगु खः। थ्वयां न्ह्यः जूगु समूह चरणया कासाय् चितवनं नेपाल आदिवासी पत्रकार महासंघ (फोनिज) व येँ जिल्लायात बुकाः सेमिफाइनलय् वंगु खःसा येँ जिल्लां फोनिजयात बुकाः सेमिफाइनलय् थाय् दयेकूगु खः। अथेहे कलाकार टिमं पत्रकार दबू केन्द्र व यल जिल्लायात बुकाः सेमिफाइनलय् थाय् दयेकूगु खःसा पत्रकार दबू केन्द्रं यल जिल्लायात बुकाः सेमिफाइनलय् दुहां वंगु खः ।
कलाकार टिम व येँ जिल्ला दथुइ जूगु न्हापांगु सेमिफाइनलय् कासाय् येँ जिल्लां ६–२ गोलं त्याकुसें फाइनलय् थाय् दयेकूगु खःसा निगू सेमिफाइनलय् चितवनं केन्द्रयात ५–१ गोलं बुकुसें सेमिफाइनलय् थाय् दयेकूगु खः। कासा लिपा जूगु छगू ज्याझ्वःया दथुइ यल महानगरपालिकाया उपमेयर मञ्जरी शाक्यं धेंधेंबल्लाखय् सहभागीपिंत दसिपौ लःल्हानादीगु खः।
ज्याझ्वःया उलेज्या यल महानगरपालिका ५ वडाया अध्यक्ष विकासमान श्रेष्ठं यानादीगु खः। धेंधेंबल्लाखय् त्याःपिंत सत्यनारायण बहादुर श्रेष्ठया स्मृति दिवस पुस १३ गते जुइगु ज्याझ्वलय् कप व मेडल लःल्हाइगु जूगु दु।
