गोल्डेन भ्वाईस अफ नेपाल कथं म्हस्यूम्ह प्रेमध्वज प्रधान व प्रतिमा राजभण्डारीया “छन्त छु जुल” बोलया म्ये यात कया दयेकातःगु म्युजिक भिडियो म्हिगः छगू ज्याझ्वः दथुइ पितब्वज्या जूग दु। थुगु म्येया रचना नांजाम्ह म्ये च्वमि निर्मलरत्न शाक्यं यानादीगु खःसा वयकलं हे लसय् हनादीगु खः।

थ्व म्येया निंतिं सुमन कपालिं बाजं ग्वसाः ग्वयादीगु खः। विश्वास बज्राचार्यया निर्देशनय् लुजः सिंहं छायाँकन यानादीगु खःसा कर्मा व शोभा महर्जनं अभिनय यानादीगु खः। ख्यालिजुजु मदनकृष्ण श्रेष्ठ मूपाहाँ कथं झायादीगु उगु ज्याझ्वलय् वयकलं त्वाः देवाय् मतच्याका उलेज्या यानादीगु खः। वयकलं नुगःखँ तयेगु झ्वलय् गीतसंगीतया जादू वर्णन यानां याये फइगु मखुगु धका खँ न्ह्यथंसे गीतसंगीतं हे थःयात जीवनय् उर्जा बिया च्वंगु दु धका धयादिल।

अथेहेतुं वयकलं म्ये च्वमि व लय् चिनामि शाक्यया कलाकारिताया प्रशंसा यानादिसे थःगु परिवारया निंतिं नं शाक्यपाखें म्ये सृजना जुइगु आश नं प्वंकादिल । ज्याझ्वलय् विशेष अतिथि सिनेकःमि एवं साहित्य अन्वेषक प्रकाश सायमिं भिडियो दुने छ्यलातःगु प्रविधीया प्रसंशा यानादिसे थुके नुगः मस्यासे खर्च यानातःगुलिं भिडियो तसकं स्वयेबहः जू धका धयादिल।

नेपालभाषाया न्हांपाम्ह म्युजिक भिडियो निर्देेशक विजयरत्न असंबरें उगु भिडियोया निर्देशन व कलाकारिता पक्ष बाँलाना च्वंगुलिं म्येयात अझ बाँलाका बिउगु दु धका धयादिल । ज्याझ्वलय् संगीतकार मनराजा नकःमि, म्येहालामि प्रतिमा राजभण्डारी व म्युजिक भिडियो निर्देशक विश्वास बज्राचार्य लगायत सभानायः जुयादीम्ह म्येच्वमि व लय् चिनामि निर्मलरत्न शाक्यं उगु म्येबारे थःथःगु नुगःखँ तयादीगु खः।

Categorized in मनोरन्जन