साहित्यकार लिसें पुलांम्ह पत्रकार आर.के. निर्मलं भाय् हिलाः च्वयादीगु मचा उपन्यास ’अजूचायापुगु जादुया भुखाचा’ सार्वजनिक जूगु दु।

साहित्यकार आर.के. निर्मलया न्हापांगु ज्याःजंक्वया लसताय् लहना मिडियाया लुखां उगु उपन्यास सफू पिदंगु खः । वंगु शनिबाः जंक्व भ्वय्या दथुइ हे छगू ज्याझ्वः यासें उपन्यासया लोकार्पण याःगु खः।

नेवाः न्ह्यलुवा मल्ल के. सुन्दर, लहना मिडियाया नायः नृपेन्द्रलाल श्रेष्ठ, व्यवस्थापक सुरेन्द्रभक्त श्रेष्ठ, साहित्यकार आर.के. निर्मल व वय्कःया तिरिमय्जु बिन्दीरा राजोपाध्यायलिसें वय्कःपिनि परिवारं सफूया लोकार्पण यानादिल। सफूया विमोचन धुंकाः न्ववासें नेवाः न्ह्यलुवाः मल्लं भाषा आन्दोलनलिसें पत्रकारिता क्षेत्रय् थः पुलांम्ह सहकर्मी आर. के. निर्मलया उपन्यास सार्वजनिक जूगुलिइ लसता प्वंकादिल। भाषा आन्दोलननिसें जिं इनाप वाःपौ पिथनाच्वनागु इलय् जितः मदिक्क सक्रिय रुपं साथ ब्यूम्ह पासा आर.के. निर्मलया ज्याःजंक्वकुन्हु काय्पिं जानाः पिथंगु थ्व सफू हे वय्कःयात दकले तःधंगु सगं खः। थ्वयां लिपा निर्मलया च्वसा आः गबलें मदीमा, न्ह्यानाः तुं च्वनेमा, जिगु भिन्तुना’ मल्लं धयादिल।

चाब थ्येन ईं च्वयादीगु चाइनिज उपन्यासयात श्यामा बल्लभं अनुवाद यानाः ’जादुकी तुम्बी’ नामं हिन्दी भाषां पिथंगु खःसा व हे हिन्दी भाय्या उपन्यासयात साहित्यकार आर.के निर्मलं नेवाः भाषां हीकाः विश्वभुमि न्हिपौया शुक्रबाःया तँसापतिइ धारावाहिक रुपं पिथनादीगु खः। व हे बाखंयात ’अजूचायापुगु जादुया भुखाचा’ नामं सफूया रुपय् आः पिथंगु खः।

ज्याझ्वलय् लहना मिडियाया व्यवस्थापक सुरेन्द्र भक्तं प्यदँ न्यादँ न्ह्यःनिसें पिथने धाधां लिबानाच्वंगु सफू, च्वमिया हे ज्याःजंक्वकुन्हु पिथनेखंगुलिइ थःपिन्त गौरवया अनुभूति जूगु धयादिल।

लहना मिडियाया नायः नृपेन्द्रलालं पुलांम्ह पत्रकारलिसें साहित्यकार आर.के. निर्मलया जंक्वकुन्हु थःपिन्सं नं छुं यायेखंगुलिइ थःपिन्त भाग्यमानी हे तायेकागु धयादिल। साहित्यकार आर.के. निर्मलया चिधिकःम्ह काय् बिराजकाजी राजोपाध्यायं न्हापा हे तयार जुइधुंकूगु उपन्यास लकडाउन व मेमेगु थीथी हुनिं पिथने मखना च्वंगुलिइ जंक्वया सरप्राइज गिफ्ट कथं पिथनागु जानकारी बियादिल।

थःगु नुगःखँ तयेगु झ्वलय् साहित्यकार निर्मलं विश्वभुमि पत्रिका हे दिनावंबलय् शुक्रबाःया तँसापतिइ पूवनेमफूगु उपन्यासयात आः सफूया रुपं पूर्णता बीखंबलय् थः लय्तायागु धयादिल। ’न्हापा हे पिदनीगु धाःगु सफू उबलय् पिमदन । आः जिगु जंक्वया लसताय् धकाः जिं हे मसीक थ्व सफू थुकथं पिदंबलय् जि धात्थें हे अजू चाल, जिगु लागिं थ्व धात्थें हे सरप्राइज गिफ्ट हे जुल’ साहित्यकार निर्मलं धयादिल ।

सफूया प्रकाशक लहना मिडिया खः। सफूया द्यबः डिजाइन सचिना राजोपाध्यायं याःगु दुसा लेआउट डिजाइन रोशन राजोपाध्यायं यानादीगु दु। सफूया मू न्यासः तका तयातःगु दु। सफू बुकिब याःपिन्त होम डेलिभरीया सुविधा दुगmुलहना मिडियां जानकारी ब्यूगु दु।

Categorized in राष्ट्रिय