झिंप्यक्वःगु नेवाः एकता दिवस नेवाःतय्गु ऐतिहासिक नापं सांस्कृतिक रुपं महत्वपूर्ण जुगु नेवाः वस्ती पनौतिइ याइगु जूगु दु।

तिथि कथं हनीगु नेवाः एकता दिवस थुगुसी पोहेलाथ्व नवःमि माघ ५ गते शुक्रवाः लाःगु दु । काभ्रेपलाञ्चोक जिल्लाया नेवाः वस्ती पनौतिइ थुगुसी नेवाः एकता दिवस यायेगु नितिं शनिवाः पनौतिया खलः पुचःया प्रतिनिधिपिनिगु भेला याना माःगु तयार याःगु दु । नेवाः देय् दबूया संयोजनाय् थीथी राजनीतिक दलया नेवाःतय्गु संगठन नापं नेवाःतय्गु जातीय संस्था व खलः पुचःयात तकं दुथ्याकाः मंकाः कथं नेवाः एकता दिवस हनेगु याना वयाच्वंगु खः।

थुगु दिवसयात नेवाःतय्सं तसकं महत्व बिया वयाच्वंगु खने दु । स्वनिगलं पिने नेवाः एकता दिवस जुइत्यंगु थ्व न्हापांखुसि खः पनौतिइ । पनौतिइ शनिवाः जूगु सहलह मुँज्याय् नेवाः देय् दबू काभ्रे जिल्ला समिति, नेवाः देय् दबू पनौति नगर समिति, हलिं नेवाः गुथि काभ्रे जिल्ला समिति, हलिं नेवाः गुथि पनौति नगर समिति, नवलकचा नवाल समाज, भिन्तुना ग्रप पनौति, तःमुँज्या समिति, कार्यविनायक महिला समूह, महालक्ष्मी महिला समुह, पनौति नेपाल लागायपिं प्रतिनिधिपिं सहभागी जुयादीगु खः।

थुगु दिवसया बारे थुइकेत नापं समन्वय यायेगु नितिं नेवाः देय् दबू स्वनिगः विशेष प्रदेशया नायो श्रीकृष्ण महर्जन वना सहलह ब्याकादीगु खः। स्वनिगलं पिने न्हापांखुसि जुइत्यंगु नेवाः एकता दिवसया थःगु हे कथंया महत्व दुसा थुकियात अझ अप्वः प्रभावकारी यायेगु नितिं नं उगु सहलह मुँज्याय् खँ जूगु खः। थुगुसी झिंप्यक्वःगु नेवाः एकता दिवस पनौतिइ याये खना थःपिं तसकं उत्साहित जुयागु दु धकाः तकं स्थानीय खलः पुचःया प्रतिनिधिपिन्सं धयादीगु खः।

नेवाःतय्सं नेवाःत एकता जूगु नापं नेवाः स्वायत्त राज्य घोषणा जूगु दिंयात लुमंकाः दँय् दसं नेवाः एकता दिवस हना वयाच्वंगु खः। थ्व स्वया न्हापां बलम्बुइ नेवाः एकता दिवस याःगु खःसा थुगुसी पनौतिइ यायेगु नितिं माःगु तयारी यायेगु ज्या जुयाच्वंगु दु।

नेवाःतय्गु हक अधिकारया नितिं सः थ्वयेकेगु अले नेवाः छ छप्पँ जुइगु छगू माध्यमया रुपय् नं नेवाः एकता दिवसयात हना वयाच्वंगु खः । नेवाः एकता दिवसया लसताय् नेवाःतसें थःथःगु लागाय् नं थीथी कथंया ज्याझ्वः याना नेवाः एकता क्यनेगु नापं नेवाः सः थ्वयेकेगु यानाच्वंगु दु।

Categorized in राष्ट्रिय