थ्व हे वइगु पोहेलाथ्व नवःमि शुक्रवाः कुन्हु जुइगु झिंप्यक्वःगु नेवाः एकता दिवसय् नेवाः संघर्ष समिति घोषणा यायेगु तयारी जूगु दु।

नेवाः देय् दबूया ग्वसालय् थीथी राजनीतिक पार्टीया नेवाः संगठन, नेवाः खलः पुचः नापं नेवाः देय् दबूया स्वनिगः विशेष प्रदेश, येँ, यल, ख्वप जिल्ला समिति नापं स्वनिगःया थीथी पालिका समितिया प्रतिनिधिपिं दुथ्याःगु देय् दबूया केन्द्रीय ज्याकुथिइ जूगु मुँज्यां झिंप्यक्वःगु नेवाः एकता दिवस तःजिक हनेगु नापं नेवाः एकता दिवसय् हे नेवाः अधिकारया नितिं सकल नेवाःत छप्पँ छधी जुयाः संघर्ष याना वनेगु नितिं नेवाः संघर्ष समिति घोषणा यायेगु निर्णय याःगु खः।

नेवाः एकता दिवसयात तःजिक हनेगु निंतिं नं माःगु कथं तयारी याना वनेमाःगु, सांस्कृतिक झाँकी सहित ब्वति कायेगु, नेवाः खलःपुचःनिसें नेवाः देय् दबूया थीथी कचायात नं ब्वति कायेकेगु धाःगु दु। नेवाः एकता दिवसया झ्वलय् पनौतीइ सांस्कृतिक झाँकी सहित जुलुस पिकयाः अनया लाय्कू लागाय् सभा यायेगु योजना दयेकूगु दु।

थुकिया नितिं पनौतीया स्थानीय खलः पुचःतपाखें माःगु कथंया व्यवस्थापन याइ धाःगु दु।

Categorized in राष्ट्रिय