नेपालभाषा मिसा खलःया स्वीप्यक्वःगु दँमुँज्या क्वचाःगु दु।

स्वयम्भूइ खलःया थःगु हे भवनय् जूगु उगु दँमुँज्या खलःया नायः धर्मशोभा तुलाधरया सभाध्यक्षताय् जूगु खः । वंगु दच्छिया दुने दिवंगत जुयादीपिं खलःया जः व जःपिनि छेँजःया लुमन्तिइ छगू मिनेट मौनधारण यासे न्ह्याःगु ज्याझ्वलय् खलःया लिउछ्याञ्जे पद्मलक्ष्मी ताम्राकारं लसकुस यानादीगु खः ।

खलःया छ्याञ्जे प्रेमहिरा तुलाधरं आर्थिक दँ ०७९÷८० या वार्षिक प्रतिवेदन व भावी कार्ययोजना न्ह्यब्वयादीगु दँमुँज्याय् दांभरिं पूर्णिमा डंगोलं वंगु आर्थिक दँया आर्थिक प्रतिवेदनलिसें लेखा परीक्षण प्रतिवेदन न्ह्यब्वयादीगु खः । निगुलिं प्रतिवेदनय् खलःया जःपिंसं व्यापक सहलह यासें थःथःगु सुझाव बियादीगु खः ।

दँमुँज्याय् खलःया निवर्तमान नायः मंगला कारंजित, संरक्षक सुवर्णकेशरी चित्रकारं नं थःथःगु नुगःखँ तयादीगु खः । वय्कःपिंसं भाषा, साहित्य, संस्कृतिया ख्यलय् खलकं याना वयाच्वंगु ज्यायात कयाः च्वछासे खलकं याइगु थुकथंया ज्याझ्वलय् अझ अप्वः मिसातय्त सक्रिय रुपं सहभागि यायेत इनाप यानादिल ।

Categorized in राष्ट्रिय