नेवाः समुदायया २१ गु जाति छगू हे संरचनाय् न्ह्यनीकथं स्वंगु यल नेवाः समाजं संस्थागत विकासया प्रक्रिया न्ह्याका यंकूगु दु।

समाजया तदर्थ समितिं प्रारम्भिक दँमुँज्या यानाः प्रक्रियाय् न्ह्यज्याःवंगु खः । वंगु शनिवाः पाटन संग्रहालय लागाय् ग्वसाःग्वःगु समाजया प्रारम्भिक दँमुँज्यां तदर्थ समिति विघटन यानाः न्हूगु ज्यासना पुचः ल्यःगु दु। सभाया उलेज्या यासें वाग्मती प्रदेशया उद्योग, वाणिज्य, भूमी प्रशासन मन्त्री रामकृष्ण चित्रकारं नेपालभाषा, संस्कृति व जातीय हकअधिकारया निंतिं नेवाः समुदाय छधी जुइमाःगु खँय् बः बियादिल ।

उगु लसताय् वाग्मती प्रदेशसभा दुजःपिं प्रेमभक्त महर्जन, रघुनाथ महर्जनं बृहत्तर हितया निंतिं मंकाः कुतःया लकस ब्वलंका यंकेमाःगु खँ कनादिल । ज्याझ्वलय् नेवाः देय् दबूया केन्द्रीय नायः पवित्र बज्राचार्यं नेवाः समाजं चिच्चा दनाच्वंगु जातीय समाजयात छगू हे थासय् हःगुलिं लसता प्वंकादिल।

दँमुँज्यां ताम्रकार समाजया नायः विनोद ताम्रकारया नायःसुइ गुम्ह दुजः दुगु न्हूगु ज्यासना पुचः ल्यःगु दु। समितिया न्वकु स्यःस्यः समाजया छ्याञ्जे न्हुच्छेबहादुर नेम्कुल, छ्याञ्जे राजोपाध्याय समाजया नायः सञ्जयशर्मा राजोपाध्याय, दांभरिं तण्डुकार समाजया नायः शिवराम तण्डुकार, लिउछ्याञ्जे सिकर्मी समाजया नायः विष्णुलाल सिकर्मी च्वनादीगु दु। ज्यासना पुचःया दुजलय् जोशी समाजया नायः दिपेशमान जोशी, देउला समाजया नायः प्रकाश देउला, कर्माचार्य समाजया छ्याञ्जे कृष्णदास कर्माचार्य व शिल्पकार समाजया नायः धर्मरत्न शिल्पकार ल्यःगु दु।

विशेषतः यलयात मू कार्यक्षेत्र दय्काः क्रियाशील उगु संगठनतय्गु संस्थागत प्रतिनिधिमूलक संगठनकथं समाजया स्थापना याःगु खः । समाजय् कर्माचार्य, कपाली, खड्गी, चित्रकार, ज्यापू, जोशी, तण्डुकार, ताम्रकार, द्योला, नकर्मी, नापित, वाद्यकार, बाराही, बौद्ध विहार संघ, रजक समाज, रञ्जितकार समाज, राजोपाध्याय, स्यःस्यः, सिकःमी व शिल्पकार समाज आबद्ध दु। समाजया स्वापू ज्याकू आःयात यल महानगरपालिका – १९ य् च्वंगु इखालखुइ तयातःगु दु। थःगु जाति दुने न्ह्यानावयाच्वंगु संस्कार, रितिरिवाजया संरक्षण लिसें नेवाः समुदायया हकहित, नेपाल भाषा, संस्कृति व परम्परा ल्यंकेत ब्यागलं ब्यागलं ज्या यानावयाच्वंगु थुपिं संगठनं मंकाः कथं समन्वय यासें न्ह्यः ज्याय्त समाज स्वनेज्या जूगु नायः विनोद ताम्रकारं कनादिल।

नेपाल भाषा मंका खलकं वि.सं. २०६७ सालनिसें थीथी जातीय समाजलिसे समन्वय यानाः नेपाल संवत् न्हूदँ हनेज्या न्ह्याके व समन्वयया लकस ब्वलंगु खः । अनंलिपा दँय्दसं नेपाल संवत् न्हूदँ हनेत पालंपाः जातीय समाजयात पाः बीगु ज्या न्ह्याःगु खः । सरकारं २०७५ सालय् प्रस्तावित याःगु गुठी विधेयक विरुद्धया आन्दोलन, २०७७ साल भदौ १८ गते बुंगद्यः पूच्वं सालेगु झ्वलय् जूगु झडपया घटना धुंकाः उगु संगठनतय्त थःथःगु जातीय संगठनया चाकलं च्वन्ह्यानाः बिचाः याय्माःगु, नापं च्वनेमाःगु व जानाः ज्या याय्माःगु अवस्था ब्वलंगु नायः ताम्रकारं कनादिल।

थीथी घटनाक्रमं ब्यूगु हसनायात मथुइकेगु खःसा तातुना, हकहितया एजेण्डायात सम्बोधन याकेत कथहं लिउने लालां वनीगु स्थिति खनेदय्वं फुक्क जाति समाज न्ह्यनीगु यल नेवाः समाज स्वनेज्या जूगु खः’ समाजया सचिव सञ्जयशर्मा राजोपाध्यायं कनादिल । थीथी जातीय समाज दथुइ पारस्परिक सद्भाव व आपसी साझेदारी यानाः समुन्नत दय्केगु समाजया मू प्रस्थापना दु। समाजया आज्जुकथं यलया मूर्त व अमूर्त संस्कृति, सम्पदाय ल्यंकेगु, नेपालभाषाया प्रर्वद्धन याय्गु मू तातुना तयातःगु दु।

Categorized in राष्ट्रिय