२०८१ बैशाख १०, सोमबार

कपिलवस्तुयात विश्व सम्पदाया धलखय् दुथ्याकेगु प्रस्ताव दर्ता

लहनान्युज | पोहेलागा सप्तमी ११४४, माघ १९ शुक्रवाः

लुम्बिनी विकास कोषया सदस्य सचिव सानुराजा शाक्यं छगू वक्तव्य पित बिसें थुकिया जानकारी बियादीगु खः। विज्ञप्तिइ धयातःकथं अन्तर्राष्ट्रिय रुपं नांजाःपिं आपालं पुरातत्वविद्त जानाः नेपाःया थ्व प्रस्ताव तयार याःगु खः। कपिलवस्तुयात विश्व सम्पदाया धलखय् दुथ्याकेगु लागिं औपचारिक प्रस्ताव दर्ता जुइ फुगु नं नेपाःया लागिं लसताया विषय जूगु खँ विज्ञप्तिइ धयातःगु दु।

प्रस्तावय् बेलायतया दूरहाम विश्वविद्यालयया प्रा.रोविन कनिङघमया नेतृत्वय् कपिलवस्तुइ जूगु उत्खननं लुया वःगु तथ्य व विवरणत नं दुथ्याकूगु खः। भगवान बुद्धं थःगु जीवनया २९ दँ व्यतित याःगु प्राचीन शाक्य गणतन्त्रया राजधानी तिलौराकोट कपिलवस्तुयात विश्व सम्पदाया धलखय् दुथ्याकेगु लागिं नेपाः सरकारपाखें युनेस्कोय् औपचारिक रुपं मनोनयन पेश याःगु दु।

फ्रान्सया पेरिसय् च्वंगु विश्व सम्पदा केन्द्रया केन्द्रीय कार्यालयय् फ्रान्सया लागिं नेपाः राजदूत लिसें युनेस्कोया लागिं नेपाःया स्थायी प्रतिनिधि सुधिर भट्टराईं युनेस्को वल्र्ड हेरिटेज केन्द्रया निर्देशक लाजारे इलोन्डोयात म्हिगः थ्व प्रस्ताव लःल्हानादीगु खः।

कपिलवस्तुयात विश्व सम्पदाया धलखय् दुथ्याकेगु लागिं युनेस्कों सन् १९९५ स हे विश्व सम्पदाया सम्भावित सूचीइ समावेश याःगु खः। नेपाःपाखें सन् २०२५ तकया दुने कपिलवस्तुयात विश्व सम्पदाया धलखय् दुथ्याकेगु ताः तयाः प्रस्ताव तयार यायेगु ज्या न्ह्याकूगु खः।

नेपाःपाखें औपचारिक रुपं प्रस्ताव दर्ता जुइधुंकाः आः युनेस्कोया विश्व सम्पदा केन्द्रपाखें मेमेपिं विज्ञत तयाः थुकिया अध्ययन याइ 

Categorized in राष्ट्रिय