२०८० फाल्गुण १२, शनिबार

पत्रकार महासंघया संस्थापकया अध्यक्षयात कया पत्रकार दबूया च्यूता

लहनान्युज | सिल्लाथ्व पारु ११४४, माघ २७ शनिवाः

नेपालय् न्हापांगु खुसिइ पत्रकारतय्गु हकहितया नितिं पत्रकारतय्त संगठितयासे नेपाल पत्रकार संघ स्थापना यानादीम्ह सत्यनारायण बहादुर श्रेष्ठयात सफुतिइ दुमथ्याकूसे कन्हय् नेपाल पत्रकार महासंघं “अग्र अनुहार, कथा अग्रजको, गाथा महासंघको” सफू पिकाय् त्यःगुयात कया नेपाल आदिवासी पत्रकार महासंघ व नेवाः पत्रकार राष्ट्रिय दबू न बिरोध याःगु दु।

थौं छगु बिज्ञप्ति पिकया इतिहास महुइत धाःगु दु। २००७ सालया प्रजातन्त्र बहाली लिपा तत्कालीन नेपाल टुडेया सम्पादक स्वर्गीय सत्यनारायण बहादुर श्रेष्ठं २००८ साल जेठय् नेपाल पत्रकार संघ स्थापना याना उकिया सभापति जुया नेपाःया पत्रकारतय्गु नेतृत्व यानादीगु खः । वि सं २००९ साल वैशाख २२ य् आर्यसमाज मन्दिर भोटाहिटीइ जूगु नेपाल पत्रकार संघया निक्वःगु सभां हाकनं सभापति जुयादीगु खः।

उगु बिषययात कयां नेवाः पत्रकार राष्ट्रिय दबुलिं पटक पटक नेपाल पत्रकार महासङ्घयात ध्वाथुइकुसें इतिहास भिंकेत व वइगु दिनय् संस्थापकया विषय क्वःजिइकेगु नितिं ध्यानाकर्षण यानावयाच्वंसां थुगु बिषययात गम्भीरतापूर्वक कयाच्वंगु मदु । संस्थापक अध्यक्षया बिषय सार्वजनिक बहसया विषय याःगु खः। नेपाल पत्रकार संघया संस्थापक सभापति श्रेष्ठया जीवनी दुमथ्याकूगु, वय्कःया योगदानयात अबमूल्यन याःगु, वय्कःया बारे सफुलिइ गनं हे न्ह्यमथनेगु थें जाःगु ज्यां गम्भीर न्हयसः ब्वलंगु दु । गल्ती शुरूइ याःम्ह स्वयां उकियात हाकनं हाकनं यानाच्वनेगु झन् मुर्खताया ज्या जुइ ।

छु महासंघ सम्बद्व पक्ष कन्हय्या दिनय् थुगु पलाःयात मूर्खता साबित यायेत स्वःगु खःला ? छु महासंघ ईतिहासया तथ्ययात स्वीकार याये चाहे मजूगु खःला ? पत्रकार महासंघयात पत्रकारतय्गु संगठन दयेकेत मस्वःगु खःला ? थ्वहे न्हयसःया नापनापं गलत तथ्ययात हे निरन्तरता बिइगु महासङ्घया पलाः प्रति नेवाः पत्रकार राष्ट्रिय दबूया गम्भीर ध्यानाकर्षण जूगु दु । जिपिं थ्वहे विज्ञप्ती पाखें थुगु पिथना दिकेत जोडदार माग यानाच्वना ।

थुगु सफु प्रकाशन जुलधाःसा पत्रकार महासङ्घया इतिहास व गरिमाय् गम्भीर न्ह्यसः ब्वलनीगु जुगुलि उगु प्रकाशन तुरुन्त दिकेत इनाप यानागु दु।

Categorized in राष्ट्रिय