आदिवासी जनजाति उत्थान राष्ट्रिय प्रतिष्ठानं दँय् दसं बियावया च्वंगु मातृभाषा राष्ट्रिय सेवा पुरस्कार थुगु दँय् जनकवि दुर्गालाल श्रेष्ठयात लःल्हाइगु जूगु दु।

अन्तर्राष्ट्रिय मातृभाषा दिवसया लसताय् थ्वहे वइगु फागुन ९ गते बुधवाः वय्कःयात छगु ज्याझ्वः दथुइ थुगु पुरस्कार लःल्हाइगु धका प्रतिष्ठानं विज्ञप्ति पितबियाः जानकारी बिउगु दु ।

वय्कःयात छगु ज्याझ्वः दथुइ संघीय मामिला लिसे सामान्य प्रशासन मन्त्री अनिता देवीपाखें छगु लखं नगद नाप सिरपा लःल्हाइगुु जानकारी बिगु खः। वय्कलं नेपाली साहित्यया नापं नेपाल भाषाया साहित्य उत्थान व विकासय् अतुलनीय योगदानयागु उच्च मूल्याङ्कन यासें उगु पुरस्कार बिइ त्यंगु खः।

थ्व पुरस्कार थ्व सिवे न्ह्यः साहित्यकार तिलक विक्रम नेम्वाङ व वाङ्गमय शताब्दी पुरुष संस्कृतिविद् डा.सत्यमोहन जोशीयात लःल्हाय् धुंकुगु दु।

Categorized in राष्ट्रिय