नेवाः देय् दबू बागमती प्रदेशया संयोजनय् नेवाः समाज भरतपुरया ग्वसालय् शनिवाःनिसें बागमती प्रदेश स्तरीय नेपालभाषा प्रशिक्षक प्रशिक्षण तालिम शुरु जूगु दु।

प्रदेशया थीथी जिल्ला व पालिकापाखें उगु भाषा तालिमय् ब्वति कयादीगु दु। पवित्र कसाःजुं प्रशिक्षण बियादीगु उगु तालिम प्यन्हु तक न्ह्याइ धकाः धाःगु दु। शनिवाः औपचारिक रुपं उगु तालिमया उलेज्या बागमती प्रदेशया सभामुख भुवन पाठकं यानादीगु खः।

मूपाहां प्रदेशया सभामुख पाठकं नेपालभाषा व तामाङ भाषायात सरकारी कामकाजि भाषाया रुपय् लागू यायेगु नितिं नियमावली दयेकेगु ज्या नं न्ह्यानाच्वंगु दु धकाः धयादिल। देय् दबू बागमती प्रदेश समितिया इन्चार्ज नापं केन्द्रीय न्वकू शान्त श्रेष्ठया सभाध्यक्षताय् जूगु उगु ज्याझ्वलय् देय् दबू केन्द्रया बरिष्ठ न्वकू चन्द्रलाल राजभण्डारी, मूछ्याञ्जे सत्यनारायण डंगोलपिन्सं तालिम नापं नेपालभाषा व नेवाःतय्गु बारे न्वंवानादीगु खः।

ज्याझ्वलय् बागमती प्रदेशय् नेपालभाषा व तामाङभाषायात सरकारी कामकाजि भाषाया रुपय् लागू यायेगु नितिं प्रदेश भाषा ऐन निर्माण यायेत जनस्तरं नेतृत्वदायी भूमिका निर्वाह यानादीगुलिं देय् दबू स्वनिगः विशेष प्रदशेया नायः श्रीकृष्ण महर्जनयात हना पौ तकं लःल्हाःगु खः।

Categorized in राष्ट्रिय