पद्मरत्न तुलाधरया जंक्वया नितिं निर्देशन पुचः नीस्वन
लहनान्युज | तछलागा षष्ठि ११३८ ( जुलाई ४ २०१८ )
जाति, भाषा, मानव अधिकार, आदिवासी जनजाति व नागरिक आन्दोलनया न्ह्यलुवाः भाजु पद्मरत्न तुलाधरया ज्या जंक्वया लसताय् जुइगु नागरिक अभिनन्दन ज्याझ्वःयात व्यवस्थित यायेगु लागिं जाति भाषा आन्दोलनया न्ह्यलुवाःपिनिगु छगू निर्देशन पुचः नीस्वंगु दु ।
भाषासेवी, समाजसेवी लिसें उद्योगपति लक्ष्मीदास मानन्धरया अध्यक्षताय् ने.सं. ११३८ तछलागा षष्ठि (वि.सं. २०७५ असार २० गते) बुधवाः च्वंगु मुँज्यां उगु पुचः नीस्वंगु खः ।
पुचलय् जनकवि दुर्गालाल श्रेष्ठ, जनगायक भृगुराम श्रेष्ठ, नेवाः न्ह्यलुवाःपिं मल्ल के. सुन्दर, नरेशवीर शाक्य व ख्यालः स्यनामि गणेश साय्मि च्वनादीगु दु ।
निर्देशन पुचलं थ्वहे वइगु आइतवाः छगू तःजिगु भेला सःतुसें अभिनन्दन ज्याझ्वःया नितिं माःगु थीथी कवः व न्हियान्हिथं ज्या यायेत छगू सचिवालय नं नीस्वनेगु निर्णय याःगु दु ।
भाजु तुलाधरया ज्याःजंक्व थ्वहे वइगु गुंला (भाद्र १६ गते) य् लानाच्वंगु दुसा वय्कःयात नागरिक अभिनन्दन भाद्र २३ गते तःजिक याइगु जूगु दु ।
