चिबाखं “जूम मिटिंग“
ज्ञानीराजा मानन्धर | सिल्लागा चःह्रे ११४४, फागुन २६ शनिवाः
छगू जूम मिटिंगय् साहित्य वाचनय् जिं नं ब्वति कया। जूमया आपालं आपाः धैथें अनुभव दुपिं व चाकुमाकूगु यःमरिथें सवाः कायेनंपिं साहित्यकारपिनिगु उपस्थिति दूगु व ज्याझ्वलय् गुम्हं सगरमाथाया च्वकाय् च्वंच्वंम्ह थें च्वंक ख्वातूगु सँय् ज्याकेट पुनानं मगानां सिलखं भुनां च्वंपिं सा गुम्हं न्ह्यथना तःगु ई स्वयाः नं लिबाक्क उपस्थित जूवल। थः जक मखु, नापं थुजःगु चिकुबलय् गन्जि छपाः जक फिनातःम्ह छम्ह इरुथिरु जुया च्वंगु दृश्य खनां न्हिले वयाः जि भिडिओ म्युट यानां स्वया च्वना।
गुम्हं थःगु ख्वाः मब्वसें छपुनिपु ल्यं दनिगु सँ व चुलुसे च्वंगु छ्यं जक ब्वयाः क्यना च्वन। ज्याझ्वः न्ह्याकामिं “छिगु ख्वाः खने मन्त, छ्यं जक खने दैच्वन। छि भचा स्क्रीन पाखें तापाक्क च्वना दिसँ“ धायेवं स्क्रीन पाखें जक मखुसें जूम सभां हे तापाना वन। लिपा थःगु च्वसु ब्वनेगु पाःवःबलय् च्वसु ब्वनाच्वंगु इलय् क्वथाया सिलिंग जक फोकस जुया च्वन। वाचनया झ्वलय् दथुइ हे प्राबिधिक गड्बडिं सः हे ताये मदया वन। च्वसु हे पूमवंक बेपत्ता ज्वीमाल।
छम्ह थःगु पाः गुब्ले वैगुज्वी धैगु आत्तुरता क्यना च्वंगु भूसी दु। तस्कं हे बांलाक समाः याना वःम्हं वयकः छम्ह सकृयम्ह सामाजिक कार्यकर्ता, नेपाल भाषा व खस भासं च्वया च्वनादीम्ह वय्’कःया न्यागुखुगु कृति नं पिदने धुंकूगु दु धैगु न्यना। छु छु नेवाः साहित्यिक कचाया दुजः नं खः। वयकलं मांभाय् यात मतिना यायेमाः धाइगु नं यक्क्व हे न्यना तैगु दु। ज्याझ्वःया हाफटाइमय् स्क्रीनय् थःगु ख्वाः खने मदयेवं हे सः थ्वल “ए बाबु हेर, स्क्रीनमा मामुको फोटै आएन। के भएको यो?“
