द्यःयाके नुगः दइमखु
आर. मानन्धर | सिल्लागा चःह्रे ११४४, फागुन २६ शनिवाः
व द्यः खः
उकिं वयाके नुगः दइमखु
नुगः दयेत न्हापां मनू जुइमाः ।
द्यःयाके शक्ति दइ
अपार शक्ति
वयाके संवेदना दइमखु
छाय्धाःसा, शक्ति व संवेदना नापं च्वनीमखु ।
व द्यः खः
उकिं
व धाय्मरं लय्तायाः हर्र न्हिले नं फु
तमं मि जुया च्याये नं फु
वं वरदान नं बी फु
दण्ड नं बी फु ।
वं दयेके नं फु
स्यंके नं फु
सृष्टि, संहार वया हे ल्हाती ।
वं उद्धार नं यायेफु
विनाश नं यायेफु
वं जीवन नं बी फु
जीवन म्वय्हिले नं फु ।
वया सुं थः दइमखु
वया सुं पासा दइमखु
उकिं वं न्ह्याम्हसिया नं हत्या यायेफु÷याकेफु ।
वयात केवल भोग माःगु दु
म्वाःहि माःगु दु
अले, स्तुति माःगु दु
उकिं वं महाभारत न्यायेकाच्वनी
अले रामायण च्वकाच्वनी ।
