२०८१ जेठ १३, आइतबार

नागबहालय् सम्यक महादान

लहनान्युज | चिल्लाथ्व चौथी ११४४, चैत्र १ बिहीवाः

यलया नागबहालय् स्वनिगःया ३२ गु महाविहारया द्यःपि भेला जूगु दु। न्यादँय् छकः जुइगु सम्यक महादान पर्वय् १२५ द्यःपि छगु हे थासय् मुनेगु याइ।

सम्यक महादान पर्व म्हिगः फागुन ३० गते विहीवाः चान्ह्यः १० बजेनिसे १ बजेतक थीथी थासय् च्वपि भक्तजनपिन्त परम्परागत बाजं थाना दःपि खटय् तया नागबहालय् यकूगु खः।

नागबहालय् स्वया न्हापां यलया लाय्कूलि तयातःगु खः। वया लिपा बसुन्धरा द्यःया रथ जात्रा याये धुका यलया लाय्कूलि तयातःपि द्यःपि नागबहालय् झ्वलाक्क यकूगु खः।

यलय् ७७३ दँ निसे ठकुरीवंशया जुगु भाष्करदेवया पालानिसे सम्यक महादान पर्व निरन्तर न्ह्याना वयाच्वंगु धका विश्वास यानातःगु दु।

विसं १८६१ त्क दँय् दँसं जुया वयाच्वंगु महादान पर्व वयालिपा न्यादँय् छकः न्ह्याना वयाच्वंगु खः।

Categorized in राष्ट्रिय