२०८१ जेठ १२, शनिबार

साहित्यकार परशु प्रधान मन्त

लहनान्युज | चिल्लाथ्व दशमी ११४४, चैत्र ६ मंगलवाः

साहित्यकार लिसे बाखंच्वमि परशु प्रधान ८० दँय् मन्त। म्हिगः चान्ह्यः बानेश्वरस्थित थःगु हे निवासय् मदुगु खः।

प्रधानया पार्थिव शरीर थौ सुथय् ९ बजे बानेश्वरस्थित राधामोहन मार्गय् श्रद्धाञ्जली बिइगु निति तयातःगु दु। विसं २००० य् भोजपुरय् जन्म जूम्ह वयकः गद्य बाखं व उपन्यास विधाय् च्वसा न्ह्याकादीम्ह खः।

पीआर प्रधान नाम तक म्हसिउम्ह वयकःया न्हापागु च्वसु विसं २०१६ सालय् विराटनगरपाखे छहारीइ ‘हाँसेकी ती चन्द्रमा’ शीर्षकय् प्रकाशित जुगु खः। वयकःया १३ बाखं संग्रह प्रकाशित जुइ धुकुगु दु।

बक्ररेखा, फेरी आक्रमण, यौटा अर्को दन्त्यकथा, असम्बद्ध, समुद्रमा अस्ताउने सूर्य, प्रतिनिधि कथाहरु, यौटा क्रान्तिपुरुषको जन्म, कथा व रचनागर्भ, उत्तरार्ध, द लिटिल बुद्ध इन टोकियो, परशु प्रधानको उत्कृष्ट कथा, नेपलिज लभ स्टोरी व धनिया कथा संग्रह प्रकाशित जुइ धुकुगु दु। प्रधानं मचा बाल साहित्यय् न थःगु च्वसाः न्ह्याकादीगु दु।

वयकलं मचा साहित्यय् नानीको कथा, सुनको छाती, रीताको स्कूल लगायत सफू पिहावये धुकुगु दु।

Categorized in राष्ट्रिय