२०८१ आषाढ १२, बुधबार

जनबहाःद्यः जात्राया लँपु अव्यवस्थित मयायेत इनाप

लहनान्युज | चिल्लाथ्व त्रयोदशी ११४४, चैत्र १० शनिवाः

थ्वहे वइगु बैशाख ४ गतेनिसें न्यान्हुतक न्ह्याइगु जनबहाःद्यःया रथजात्रा न्यायेकेगु लँपुइ गुगु नं कथंया अव्यवस्थित मयायेत जनबहाःद्यः रथजात्रा व्यवस्थापन समितिं इनाप याःगु दु।

समितिया नायः लिसें जनबहाःद्यःया गुरुजु निलकाजी शाक्यं छगू प्रेस विज्ञप्ति पितब्युसें बैशाख ४ गतेनिसें जात्रा न्ह्याइगु जूगुलिं उगु जात्रा न्ह्याइगु लँपुइ अव्यवस्थित मजुइक ज्याखँ यायेत इनाप यानादीगु खः।

शाक्यं पितब्यूगु उगु वक्तव्यय् जात्रा जुइगु लागा जमं, कमलाछि, भोताहिति, असं, न्हायकं त्वाः, भेडासिं, जनबहाः, वंगः, मखं, मरु, चिकंमू, जैसिदेगः, ज्याःबहाः, लगं लिसें थुगु लागाया जःखः हिति कायेगु, धः दयेकेगु, लँ दयेकेगु, पेटी दयेकेगुआदि गुगु नं कथंया ज्या जात्रा न्ह्यः मयायेत इनाप यानादीगु खः।

उगु विज्ञप्तिइ वय्कलं छुं छुं वडां थुगु थासय् विकास निर्माणया ज्या कथं छुं न्हि न्ह्यःनिसें यानाच्वंगु दुसा जात्रा न्ह्यः हे उगु ज्या क्वचायेकेत नं इनाप यानादीगु खः।

समितिया नायः शाक्यं भोताहिति लागाय् धः दयेकेगु ज्या क्वचाःगु व लँपु दयेकेगु ज्या जुयाच्वंगु जानकारी वःगु धासें द्यःया रथ सालेबलय् उगु लँपु पायछि गुलि जू उकिया निरीक्षण येँ महानगरपालिकाया इन्जिनीयरपिंलिसे चैत्र १२ गते सोमवाः यायेगु व मेमेगु वडाय् नं थुकथंया ज्या जुयाच्वंगु थाय् निरीक्षण यायेगु जानकारी बियादीगु दु।

Categorized in राष्ट्रिय