निर्देशक बाशु शाहीया न्हू संकिपा “जुजु” या भिंसाइत चुलाकेगु ज्या वंगु  शुक्रवाः छगू ज्याझ्वःया दथुइ जूगु दु।

ख्वपय् जूगु उगु ज्याझ्वलय् सुकुन्दा फिल्म्सया कजि बाशु शाहीया सभाध्यक्षताय् जुगु उगु ज्याझ्वलय् मूपाहाँ कथं राष्ट्रिय प्रजातन्त्र पार्टीया केन्द्रिय सहायक महामन्त्री रविन्द्र प्रताप शाह व नेपालभाषाया न्हांपाम्ह सिनेपत्रकार विजयरत्न असंबरे व संगीत व संकिपाह्यमि स्वतन्त्र संसार महर्जन विशेष पाहाँ कथं झायादीगु खः।

“जुजु” संकिपाया भिंसाइतय् मूपाहाँ शाहं क्लाएप यानादीगु खःसा विशेष पाहाँ असंबरें न्यंक्या तछ्यानादिगुलि क्यामेराया स्वीच अन नेवाः एच डि टिभिया कजि नविन जोशीं यानादिगु खः। कलाकार हरि घेमोसुं अभिनय न्ह्यब्वयादीगु खः।

अथेहे उगु ज्याझ्वलय् “क्षमा” व “म्हिगः म्हिता” म्युजिक भिडियो पितब्वज्या नं जूगु खः। क्षमा संकिपाया निर्देशक राजेश गोसाइ, च्वमि रेणु सुवाल, छायाँकन व सम्पादन बालकुमार मगरं यानादीगु खः।

थुके हरि घेमोसु, सुजना बज्राचार्य, सिर्जना प्रजापति व विक्रम खडगीपिन्स अभिनय यानादीगु खः। गायक स्वयम्भु राज शाक्यं हालातःगु म्ये म्हिगः म्हिताय् निर्देशन बाशु शाही, छायाँकन विशु शाही, सम्पादन विवेक घेमोसुं यानादीगु खः।

ज्याझ्वलय् पितब्वज्या जूगु चिहासंकिपा “क्षमा” व म्युजिक भिडियो “म्हिगः म्हिता” या समीक्षा विजयरत्न असंबरें यानादिगु खः।

Categorized in राष्ट्रिय