२०८१ आषाढ १२, बुधबार

लोपोन्मुख नौ बाजं सम्मेलन क्वचाल

लहनान्युज | चिल्लाथ्व चतुर्दशी ११४४, चैत्र ११ आईतवाः

देयन्यक मानन्धरपिनिगु मंकाः संस्था केन्द्रीय मानन्धर संघं लोपोन्मुख बाजं संरक्षण अभियान सुरु याःगु दु। अमूर्त सम्पदा कथं कयातःगु मौलिक लोपोन्मुख बाजंयात न्हुगु पुस्ताय् हस्तान्तरण यायेगु आज्जु कथं संघं अभियान न्ह्याकूगु दु।

संघया ग्वसालय् येँ महानगरपालिकाया सहकार्यं मध्यपुर थिमिया क्वलाखुइ लोपोन्मुख नौ बाजं सम्मेलन ११४४ क्वचाःगु दु।

नौ बाजं धइगु गुगू किसिमया मौलिक बाजंया प्रकार व उगु कथं बाजं पुचःया ग्वहालि बाजं दुथ्याःगु दइ। विशेषयाना स्वनिगः दुने व भ्वँतय् जक थुगु बाजं थायेगु याइ। बौद्धमार्गी नेवाःतय्सं संरक्षण याना नौ बाजंयात सिद्धार्थ गौतम बुद्धया तत्कालीन इलय् कपिलबस्तुइ राजकीय बाजंया मान्यता बियातःगु धका धायेगु याइ।

श्रृंगभेरी अपदानया बाखं व स्वयम्भू पुराणय् उल्लेख जूगु नौ बाजं लिपागु इलय् तना वने धुकुगु दु। उकिइ, संघं न्हापागु पटक नेकू, पस्ताः, धाः, चति, डबडब, नगरा, खिं, पच्छिमा, प्वङा, ताः, भुस्या, छुस्या, पस्ता, नाय्खिं, धिमेचा, बे लगायतयका बाजंयात बिस्कं ताल व बोलय् न्ह्यब्बयेगु वातावरण तयार याःगु खः।

संघ अन्तर्गत युवा उपसमिति व सञ्चार उपसमितिया संयोजनय् मध्यपुर थिमिस्थित सिवा सायमि खलः व मानन्धर युवा समुहनाप समन्वय यागु उगु ज्याझ्वः मध्यपुर थिमि नगरपालिकाया मेयर सुरेन्द्र श्रेष्ठं उलेज्या यनादीगु खः। उगु ज्याझ्वलय् ख्वपया साःक्वलान, गोलमढी व तेखाच्व त्वाः, बनेपाया वांख्यो व क्वसाः दाफा भजन खलः नाप मध्यपुर थिमिया सिवा सायमि खलः न नौ बाजं प्रदर्शन याःगु खः।

ज्याझ्वः सांस्कृतिक पक्षयात सुरेन्द्र मानन्धरं व समग्रय् गजेन्द्र प्रसाद मानन्धरं संयोजन यानादीगु खः।

Categorized in राष्ट्रिय