२०८१ बैशाख १०, सोमबार

ख्वपय् निपु म्येया पितब्वज्या

लहनान्युज | चिल्लागा दुतीया ११४४, चैत्र १४ बुधवाः

ख्वपया महाकालि नृत्य कला परिषदया ग्वसालय् ख्वपय् नेवाः होलि महोत्सव ज्याझ्वः जूगु दु।

उगु ज्याझ्वलय् नेवाः कलाकारिता ख्यःया आपालं कलाकःमि मुना थवंथवय् रंग इला होलिया भिन्तुना देछागु ज्या जुगु खः।अथेहेतुं उगु ज्याझ्वलय् निर्देेशक विश्वास बज्राचार्यया बसन्तया बेला व निर्देशकं बालमुकुण्द प्रजापतिया दिलमाया निपु म्येया म्युजिक भिडियो पितब्वज्या नं जूगु खः।

परिषदया न्वकु ओमचरण अमात्यया सभाध्यक्षताय् जूगु उगु ज्याझ्वलय् कलाकारिता ख्यःया न्ह्यलुवाः आशाकाजी थकु मूपाहाँ कथं झायादीगु खः। ज्याझ्वलय् नेपालभाषाया न्हांपाम्ह सिने पत्रकार विजयरत्न असंबरे, कलाकार सुरेन्द्र तुलाधर, संगीतकार जुगल डंगोल, भक्तपुर लेडि जेसिजया पूर्व अध्यक्ष सबिका त्वायनाबासु, परिषदया मू सल्लाहकार ध्रुब नारायण श्रेष्ठ लगायत पिनिगु ब्बति दुगु खः।

सांगितिक ज्याझ्वलय् सरस्वति मानन्धर, कृष्ण महर्जन, मन्जिल शाक्य, जयलक्ष्मी सिद्धि बज्राचार्यपिन्स म्ये हालादीगु खः।

Categorized in मनोरन्जन