२०८१ जेठ १२, शनिबार

बागमती प्रदेश सरकारय् प्यंगू दल दथुइ सहमति

लहनान्युज | सिल्लागा तृतीया ११४४, चैत्र १५ बिहीवाः

सत्ता गठबन्धनय् दुगु प्यंगु दल दथुइ वाग्मती प्रदेश सरकार निर्माण यायेगुलि सहमति जूगु दु। बिहीवाः नेकपा (एमाले), नेकपा (माओवादी केन्द्र), नेकपा (एकीकृत समाजवादी) व हाम्रो नेपाली पार्टी दथुइ न्यागु बुँदे सहमति जूगु दु।

प्यंगु दल दथुइ प्रदेशसभाय् ल्यः दनिइगु कार्यकालया लागि सहकार्य यायेगु सहमति जूगु दु। सहमति पत्रय् सरकारया नेतृत्व केन्द्रया निर्णय कथं सहकार्य यायेगु धका धाःगु दु। दलपि दथुइ सरकार सञ्चालनया लागि प्रदेशस्तरीय संयन्त्र गठन याना मंकाः नीति ज्याझ्वः यायेगु सहमति जुगु खः।

सहमतिपत्रय् एमाले वाग्मती प्रदेश संसदीय दलया नेता जगन्नाथ थपलिया, माओवादी संसदीय दलया नेता शालिकराम जम्कट्टेल, एकीकृत समाजवादीया राजेन्द्रमान श्रेष्ठ व हाम्रो नेपाली पार्टीया शैलेन्द्रमान बज्रचार्यं ल्हाःचिं तःगु खः।

१ सय १० सदस्यीय वाग्मती प्रदेश सभाय् बहुमतया ५६ सांसदपिनिगु समर्थन माः। केन्द्रीय सत्ता गठबन्धनया दलमध्ये एमालेया २७, माओवादी केन्द्रया २१ व एकीकृत समाजवादीया ७ सांसदपि दु सा हाम्रो नेपाल पार्टीया निम्ह सांसदपि दु।

आः जम्कट्टेल नेतृत्वया प्रदेश सरकारय् बहुमत थ्यःगु दु।

Categorized in राष्ट्रिय