२०८१ बैशाख १०, सोमबार

राजस्थानं दिल्लीयात १२ रनं बूकल

क्षितिज श्रेष्ठ | सिल्लागा चौथी ११४४, चैत्र १६ शुक्रवाः

इन्डियन प्रिमियर लिग, आईपीएल क्रिकेटय् राजस्थान रोयल्सं दिल्ली क्यापिटल्सयात बूकां लगातार निगुगु कासा त्याकूगु दु।

जयपुरय् जुगु म्हिगः कासाय् राजस्थानं दिल्लीयात १२ रनं बूकुगु खः। १ सय ८६ रनया लक्ष्य वंगु दिल्ली २० ओभरय् ५ विकेटया क्षतिइ १ सय ७३ रन जक दयकेफुगु खः।

दिल्लीया लागि डेभिड वार्नरं ३४ बलय् दकलय् अप्पो ४९ रन दयकूगु खः। अथेहे ट्रिस्टन स्टब्सं २३ बलय् ४४ रनया अविजित इनिङ म्हितूगु खः। ऋषभ पन्तं २८ रन, मिचेल मार्शं २३ रन दयकूगु खः।

राजस्थानया लागि नान्द्रे बर्गर युजभेन्द्र चहलं निगु निगु विकेट काःगु खःसा आवेश खानं छगू विकेट काःगु खः।टस बूया न्हापां ब्याटिङ याःगु राजस्थानं ५ विकेटय् १ सय ८५ रन दयकूगु खः।

रियान परागं ४५ बलय् ७ चौका व ६ छक्का नाप ८४ रन दयकूगु खः। अथेहे रविचन्द्रण अश्विनं २९ व ध्रुव जुरेलं २० रन दयकूगु खः।

दिल्लीया खलिल अहमद, मुकेश कुमार, एनरीक नोर्टजे, अक्सर पटेल व कुलदीप यादवपिन्स छगु छगु १–१ विकेट काःगु खः।

Categorized in कासा