राष्ट्रिय मुक्ति क्रान्ति अभियान अन्तर्गतया नेवाः राष्ट्रिय परिषदं भद्रकाली प्रदर्शनया झ्वलय् ज्वनायंकूपिन्त बुधबाःया दुने मत्वःतूसा प्रहरी चौकी घेराउ यायेगु चेतावनी ब्यूगु दु।

सोमबाः येँय् पत्रकार सम्मेलन यासें परिषदया कजि सुमन साय्मिं लोकतन्त्रय् शान्तिपूर्ण आन्दोलनय् तकं प्रहरीं याःगु धरपकड स्वीकार्य मदुगु धासें ज्वनायंकूपिंमध्ये सार्वजनिक मुद्दाय् तःपिं खुम्हेसित बुधबाःया दुने निःशर्त रिहाइ यायेत चेतावनी ब्यूगु खः। ‘जिमिसं ला छुं नं म्वाःमदुगु, अराजक कथंया ज्या यानागु मदु।

लोकतन्त्रय् शान्तिपूर्ण सांस्कृतिक प्रदर्शन यानां तकं प्रहरीं जिमि १२म्ह पासापिं ज्वनायंकाः खुम्हेसित सार्वजनिक मुद्दा हे तयाः कुनातःगु दनि। बुधबाःया दुने वय्कःपिन्त मत्वःतल धाःसा वयां लिपा पिहांवइगु लिच्वःया जिम्मेवारी राज्यं कायेमाली’ कजि साय्मिं धयादिल। बहुलराष्ट्र राज्य स्थापना व नेपाः मण्डल प्रदेश घोषणा मजूतल्ले थःपिं मदीगु साय्मिया धापू खः।

उगु हे ज्याझ्वलय् न्ववासें अभियानया नेता लिसें पूर्व उपप्रधानमन्त्री राजेन्द्र महतों बुद्ध बूगु देशय् प्रहरीं बौद्ध भिक्षुयात लाकमं च्वायेगु ज्या तसकं निन्दनीय जूगु धयादिल। नश्लीय सोच दुपिन्सं बहुलराष्ट्रया अवधारणा स्वीकार याये मफयाच्वंगु धासें महतों बहुलजाती, बहुलसंस्कृति दुगु देय् धइगु अथें हे बहुलराष्ट्रिय जुइधुंकूगु धयादिल। ‘राज्य अझं नं एकलजाती, एकनश्लीय हे जुयाच्वंगु दु। थीथी धर्म, संस्कृति, समुदाय जूगु देशय् बहुलराष्ट्रिय राज्य स्थापना याकेगु जिमिगु लक्ष्य खः। थ्व छगू माग शान्तिपूर्ण ढङ्गं तयाबलय् नं राज्यं सहः याये मफूगु खनेदत’ महतों धयादिल।

ज्याझ्वःया मेमेपिं वक्तातय्सं विनाकारण प्रहरीं निर्दोष मनूतय्त लाठीचार्ज यायेगुलिसें धरपकड याःगु दावी याःगु खः। प्रदर्शनया सहभागी मखुपिं भद्रकालीइ दर्शन यायेत वयाच्वंपिं तामाङतय्त तकं प्रहरीं छ्यंगुया बुँट न्ह्यानाः भद्रकालीइ हे दुहांवनाः दाःवंगु परिषदं धाःगु दु। थ्वयां न्ह्यः वंगु शनिबाः परिषदं येँय् नेपाः मण्डल प्रदेश घोषणाया माग तसें येँय् सांस्कृतिक जुलुस पिकाःगु खः। नेवाःलिसें थीथी समुदायं थःथःगु बाजागाजा थानाः बसन्तपुलिं ¥याली पिकयाः तिंख्यः जुयाः भद्रकाली थ्यंगु खः।

भद्रकालीइ कोण सभा यायेगु ज्याझ्वः क्वःछिनातःगुलिइ प्रहरीं निषेधित क्षेत्र धासें भद्रकाली थ्यनेवं ¥यालीयात पंगु खः। प्रहरीं पंक पंक नं ¥याली न्ह्याःवनेत स्वःबलय् प्रहरीं लाठी चार्ज याःगु खःसा लाठी चार्ज ३०म्ह धइथें प्रदर्शनकारीत घाःपाः जूगु परिषदं धाःगु दु। प्रहरीं मिसात व बौद्ध भिक्षुतय्त तकं लित्तुलिनाः हे दाःगु परिषदया कुंखिना दु।

उगु इलय् प्रहरीं १२ प्रदर्शनकारी ज्वनायंकूगु खःसा खुम्हेसित त्वःतेधुंकल। मेपिं खुम्हेसित सार्वजनिक मुद्दा तयाः कुनातःगु दनि।

Categorized in राष्ट्रिय