बागमती प्रदेशय् नेपालभाषा व तामाङ भाषायात प्रदेशया सरकारी कामकाजि भाषाया रुपय् लागू यायेगु नितिं थःम्हं माःगु कथं फुक्क ज्या यायेगु जुइ धकाः बागमती प्रदेशया संस्कृति पर्यटन लिसे सहकारी मन्त्री शैलेन्द्रमान बज्राचार्यं धयादीगु दु ।

थौं विहिवाः नेवाः देय् दबू स्वनिगः विशेष प्रदेशपाखें वय्कःयात भिंतुना देछायेगु निति व भाषा ऐन लागू यायेगुबारे जूगु सहलह ज्याझ्वलय् मन्त्री बज्राचार्यं अथे धयादीगु खः। वय्कलं नेपालभाषा व तामाङ भाषायात सरकारी कामकाजि भाषा ऐन कथं लागू यायेगु नितिं हे थः मन्त्री जुयागु खः धकाः तकं धयादिगु खः।

उगु सहलह मुँज्याय् बागमती प्रदेशया राष्ट्रभाषा ऐन निर्माणया नितिं ज्वःमदुगु योगदान यानादीम्ह निर्वतमान प्रदेशया मन्त्री पुकार महर्जनं थुगु ऐन लागू यायेगु नितिं लिबाके मज्यूगु खँ कनादिसें म्हिगःया दिनय् थःम्हं उगु मन्त्रालयया नेतृत्वया ज्या यानागुया अनुभावयात कया कनादीगु खः। अथे हे भाषा आयोगया पुलांम्ह दुजः नापं प्रदेशं भाषा ऐन दयेकेगु नितिं निर्माण याःगु कार्यदलय् च्वना ज्या यानादीम्ह भाषाविद् अमृत योञ्जनं प्रदेशय् भाषा लागू यायेगु नितिं आः याकनं हे विज्ञ समुह गठन याना न्ह्याः वनेमाःगु खँय् बः बियादिल।

अथे हे कार्यदलया दुजः जुया ज्या यानादीम्ह प्रा. डा. ओमकारेश्वर श्रेष्ठं नं विज्ञ समुह गठन याना हे न्ह्याः वनेमाःगु खँय् बः बियादीगु खः। अथे हे नेवाः देय् दबू स्वनिगः विशेष प्रदेशया नायः श्रीकृष्ण महर्जनं भाषा ऐन हयेगु नितिं म्हिगः गुगु कथं भूमिका म्हितागु खः थौं लागू यायेगु नितिं नं उगु हे कथं भूमिका म्हिता ग्वहालि यायेत तयार दु धकाः धयादीगु खः।

सहलह ज्याझ्वलय् देय् दबू स्वनिगः विशेष प्रदेशया बरिष्ठ न्वकू नविन थेच्वमि, छ्याञ्जे गंगादेवी महर्जन, सचिवालय् दुजः अधिवक्ता नरेश श्रेष्ठ, भाषिक अभियन्ता अनुपसिंह सुवालं नं भाषा ऐन लागू यायेमाःगु खँय् बः बियादिसें थःगु बिचाः प्वंकादीगु खः।

Categorized in राष्ट्रिय