२०८१ आषाढ ३०, आइतबार

लगानी याये चाहेजुपि लगानीकर्तातय्त वातावरण तयार यायेमाः –मन्त्री चौधरी

लहनान्युज | चौलागा पंचमी ११४४, बैसाख १७ सोमवाः

महिला, बालबालिका लिसे ज्येष्ठ नागरिक मन्त्री भगबती चौधरीं नेपालय् लगानी याये चाहेजूपि लगानीकर्ता तयेगु लागि वातावरण तयार यायेमाः धका धयादीगु दु।

वैदेशिक लगानीकर्तातय्त आकर्षित यायेगु आज्जु कथं ग्वसाः ग्वःगु ‘नेपाल लगानी सम्मेलन २०२४’ या सन्दर्भय् सञ्चारकर्मीत नाप खँल्हानादीसे मन्त्री चौधरीं अथे धयादीगु खः।

वयकलं धयादीगु दु, ‘लगानीकर्तातय्त झीसं वातावरण दय्का बिइमाः। छु छु ऐन, कानूनया कारणं वइगु समस्या समाधानया लागि अध्यादेशपाखे लगानी सम्मेलनयात हे आधार दय्का अध्यादेश हःगु दु। खासयाना खुसीइ च्वंगु कोरिडोरया विषय खः। बाध्यात्मक अवस्था सिर्जना याइगु चिज, वातावरणीय खँ दुथ्याइ।’ लगानी यायेगु निति नेपाः छगु सम्भावना दुगु देय् खः धका धयादीसे मन्त्री चौधरीं कानूनी, भौगोलिक लिसे रणनीतिक हिसाबं न लगानीया लागि सम्भावना दु धका धयादीगु खः।

वयकलं धयादीगु दु, ‘नेपालय् लगानी यायेगु निति यक्को हे सम्भावना दु। अथे जुगुलि वैदेशिक लगानीकर्तातय्त नेपालय् हे लगानी यायेत इनाप याये। अन्तर्राष्ट्रिय लिसे राष्ट्रिय लगानीकर्ता सकसित थन थाय् न दु व सम्भावना न दु।’

Categorized in राष्ट्रिय