थ्वहे वइगु चौलागा द्वादसी बैशाख २४ गते बागमती प्रदेशं तामाङ व नेपालभाषा प्रदेशस्तरीय सरकारी कामकाजी भाषा कथं लागु जूगु दिंया लसताय् जुइगु ज्याझ्वः तःजिक हनेत समारोह समिति नीस्वंगु दु।

थौं सोमवाः छगु ज्याझ्वःयासे येँया नेपाः ब्यांक्वेटय् बागमती प्रदेश संस्कृति पर्यटन व सहकारी विकास मन्त्रालयया ग्वसालय् जूगु उगु भेलां ३०३ म्ह दुजः दूगु समारोह समिति नीस्वंगु दु। बागमती प्रदेशया संस्कृति पर्यटन व सहकारी विकासमन्त्री शैलेन्द्रमान बज्राचार्यया सभाध्यक्षताय् उगु भेलां अथे समारोह समिति नीस्वंगु खः।

ज्याझ्वलय् मन्त्री बज्राचार्यं अधिकार प्राप्त जुइधुंकाः उकियात छ्यलाबुला यायेगु नितिं सकलसित इनाप यानादिसें बागमती प्रदेशय् नेवाः व तामाङ भाय् सरकारी कामकाजीया भाषा कथं ऐन पारित जूगु तःधंगु उपलब्धी जूगु धासें थुगु ऐन लागु जूगु दिं कथं बैशाख २४ गते येँया बसन्तपुरय् सुथसिया ७ ता इलय् लसता ¥यालि व ९ ता इलय् प्रधानमन्त्री पुष्पकमल दाहाल प्रचण्डया मूपाहाँसुइ जुइगु लसता सभाय् ब्वति कायेत नं सकलसित इनाप यानादीगु खः।

मन्त्री बज्राचार्यं थ्व उपलब्धीयात जनजनय् थ्यंकेगु नितिं थःपिन्सं प्रदेशया मन्त्रिपरिषदया बैठकय् बैशाख २४ गते भाषा ऐन लागु जूगु दिं सार्वजनिक बिदा बिइमाःगु प्रस्ताव तयागु व उगु प्रस्ताव पारित जूगु धासें भाषिक अधिकारया रक्षा व छ्यलाबुला यानाः यंकेत सकलसित इनाप यानादीगु दु।

ज्याझ्वलय् नेवाः देय् दबूया नायः पवित्र बज्राचार्यं नेवाः व तामाङ जानाः नीस्वंगु प्रदेश सरकारी कामकाजी भाषा ऐन कार्यान्वयन शुभारम्भ समारोह समितिया दुजः कथं च्वनादीपिं नेवाःतय्गु नां न्ह्यब्वयादीगु खःसा अथेहे तामाङ घेदुङ संघंया सह अध्यक्ष कुमार सिं घिसिङ नं समारोह समितिइ दुजः जुयाः च्वनीपिनिगु नां न्ह्यब्वःगु खः।ज्याझ्वः नेवाः देय् दबूया न्वकू उमेश स्थापितं न्ह्याकादीगु खः ।

Categorized in राष्ट्रिय