अमेरिकाय् च्वंगु नेपाली राजदूतावासं पुरातात्विक महत्वं जाःगु नीप्यंगु मूर्ति नेपाः छ्वया हःगु दु।

अमेरिकी नागरिक सुसन व्राडफोर्ड न सङ्कलन याना उगु सामग्री हवाइ टापुइ लःल्हागु खः। दूतावासया कर्मचारीयात लःल्हाना उगु सामग्री पुरातत्व विभागनाप समन्वयय् याना बिहीवाः हवाइ लँपूपाखे नेपाल छ्वया हःगु खः।

झींस्वंगु, झींन्ह्यय्गु व झीच्यागु शताब्दीया मूर्ति स्वदेश छ्वया हयागु धका दूतावासं धाःगु दु। उगु मूर्तिकला धातु, सिँ, ल्ह्वं व क्वय् न दयका तःगु खः। उगु मूर्ति ढलोटया कालाकुवेर मूर्ति, विश्वरुपया मूर्ति, महिषासुरमर्दिनीया मूर्ति, मोक्षदा धयातःगु महामञ्जुश्री शक्तिया मूर्ति, ढलोटया विघ्नान्तक भैरवया मूर्ति, लिःयागु प्रज्ञापारमिताया मूर्ति, ढलोटया किन्नरीया मूर्ति, सिँ दयका तःगु बाराहीया मूर्ति व चमुण्डाया छ्यं, प्रस्तरया सरस्वतीया मूर्ति खः।

अथेहे मेमेगु मूर्तिइ प्रस्तरया मञ्जुश्री शक्ति, प्रस्तर अगस्थमुनिया मूर्ति, थ्याः सफू व कुवेरया मूर्ति, लिःया कालियन्त्र, क्वय् यागु सीतापाती यन्त्र, सिँयागु फुर्वा, नँयागु ताःचा, ढलोटया सिन्हमु, नँयागु त्रिशूल खः। दूतावासं दच्छिया दुने ६३ गु थीथी मूर्तिकला व वास्तुकलाया सामग्री नेपाः छ्वया हय् धुकुगु दु।

Categorized in राष्ट्रिय