नेपालभाषा एकेडेमीया चान्सलर नापं नांजाम्ह बाखं च्वमि यज्ञरत्न धाख्वाःया बाखं मुना मिसा पासायात कया ख्वपय् दुवाला ज्याझ्वः जुगु दु।

सिर्जना अभियान समाजया ग्वसालय् जूगु उगु ज्याझ्वलय् बाखंया प्रवृत्ति, बाखं न बिगु सन्देश व ब्वमिपिन्त लाइगु लिच्वःया नापं मिसा पासा दुनेया बाखंयात कया दुवालेगु ज्या जुगु खः।

साहित्यकार ध्रुव मधिकर्मीं सफूती दुथ्यागु लिपांगु झिंच्यापु बाखंयात कया समीक्षायासें न्हिथंया सामान्य झाकायात कया बाखंया बां कीया मनू दुनेया मनस्थिति ब्वय्त च्वमि सफल जूगु दु धका धयादिगु खः।

फुक्कं धयाथें बाखंया थासा छगू हे कथंया जूगु व छुं न झाकायात याउँक छसिकथं न्ह्यब्वयाब्यूगु च्वमिया विशेषता जूगु न्ह्यथना समीक्षक मधिकर्मीं बाखंया प्रभावया लागिं थुलि जक मगा उकी नाटकीय पहः व द्धन्द्धयात भचा बः बिमागु खं न कनादिल।प्राध्यापक लिसे समालोचक प्रेमहीरा तुलाधरं धाख्वाःया बाखनय् सामाजिक जीवनया थी थी विषययात ध्वाथुइ कथं ब्वयाबीगु पहः दु धका धयादीसें ब्वमिंपित बाखं ब्वनेबले याउँक थुइकेफइ धयादिल।

वय्कलं सामाजिक जीवनया नापं देशविदेशया थी थी विषययात न बाखनय् दुथ्याकेमागु खँ कनादिल। ज्याझ्वलय् बाखंच्वमि हरिगोविन्द भोमी, पत्रकार जितेन्द्र रसिक व पदमा खयरगोली, विमल ताम्राकार, सुरेन्द्रलाल भुजु, शाक्य सुरेन व दीपक मास्केपिंसं नुगःखँ तयादिगु खः।

Categorized in राष्ट्रिय