अन्तराष्ट्रिय हाइकु दिवस अप्रिल १७ या लसताय् थनया गौतम बुद्ध सभाकक्ष, महान्यायाधिवक्ता कार्यालय भवन, सिंहदरवारय् जूगु छगू समारोहस पूर्व प्रधानन्यायाधिस कल्याण श्रेष्ठं नेपालभाषाया आधुनिक गद्य कविताया छम्ह न्ह्यलुवाः, हाइजिन श्यामसुन्दर सयँजुया ‘हाइकु किचः’ नांगु ससफूया विमोचन यानादिल।

उगु ज्याझ्वलय् मूपाहां पूर्व प्रधानन्यायाधिस श्रेष्ठं थःगु मून्वचू बिइगु झ्वलय् म्हो शब्द, गहन बिषय, गहन संप्रेशन, गहन चेतनायात शसक्त रुपं न्ह्यब्वय्गु माध्ययम हाइकु जुयाच्वन धकाः धयादिसें थःत नं हाइकुं सालाकाल धकाः धयादिल। वहुआयामिक व्यक्तित्व श्यामसुन्दरया योगदानयात कदर यायेया निंतिं प्रतिष्ठान चायेकेगु आदि ज्याये थम्हं माक्व ग्वहालि यायेगु बचं नं वय्कलं बियादिल।

थ्व सिबें न्ह्यः नेवाः हाइकु ख्यःया नायः लिसें सभाया नायः जुयादीम्ह भाजु सुरेश प्रधानं नेपालय् हाइकु च्वय्गु ज्या न्ह्याःगु ई ने.सं. १०७९ (२०१६) सालं निसें हे हाइकु च्वयाः वैच्वनादीम्ह श्यामसुन्दर सयँजुया हाइकुत पाण्डुलिपि जक लिकुनाच्वंगुयात पितबिइमाःगु थौंया आवश्यकतायात नेवाः हाइकु ख्यलं महसुस यानाः थ्व ज्या न्ह्याकागु खः धयादिल।

लिसें समालोचक डा. ज्योतिप्रभा तुलाधरजुया धापूयात लिसाकासें वय्कलं सयँजुया हाइकुइ थम्हं न्हियान्हिथंया जीवन क्रमय् खंगु व अनुभव यानागु बिषय,घटना, उकिया दथुइ दुगु अन्तरविरोध, संघर्ष, विडम्बना आदियात थीथी कथं बिश्लेसन यानाः, चिन्तन यानाः अभिव्यक्त याःगु दु धयादिल ।

उगु ज्याझ्वलय् वरिष्ठ कवि, समालोचक डा. आनन्द जोशीं कवि सयँजुया नेपालभाषाया आधुनिक गद्य कविता न्ह्याकामि मध्यय्या छम्ह न्ह्यलुवाः कवि खः धयादिल । लिसें वय्कःया हाइकुं नेपालभाषाय् न्ह्यानाच्वंगु परंपरागत हाइकु व आधुनिक हाइकुया बिचय् च्वनाः ताँया भूमिका निर्वाह याःगु खँ कनादिल ।

अथेहे, सफूया प्रकाशक वरिष्ठ अधिवक्ता, श्यामसुन्दर सयँजुया तःधिकःम्ह म्ह्याय् अमितालक्ष्मी सय्ँजु श्रेष्ठं लिबाक्क हे जूसां थः अबुया कृतियात पिथने दुगुलिं थःपिनि सकल जः तसकं लय्तायाच्वनागु दु धयादिल। थः बाः श्यामसुन्दर सयँजुया वहुआयामिक व्यक्तित्वया थीथी पक्षयात दुवालदिसे वय्कलं थः बाः नं च्वयादीगु रबिन्द्रनाथ टैगोरया अनुवाद ‘गितान्जलि’ व खस् नेपाली भाषाय् च्वयादीगु ‘चस्काहरु घाउका’ धयागु कविता सफू नं याकनं प्रकाशनय् हय्गु खँ कनादिल ।

नेवाः हाइकु ख्यःया ग्वसालय् जूगु उगु ज्याझ्वः धर्मकृष्ण सिकःमिजुं न्ह्याकादीगु खःसा उगु समारोहस साहित्यकार मोहन दुवाल, साहित्यकार डा. सुमन ताम्राकार, हाइजिन लिसें नेवाः हाइकु ख्यःया न्वकू  तुयुपुं नं कवि श्यामसुन्दर व वय्कःया हाइकुया थीथी पक्षयात कयाः थःगु नुगः खँ प्वंकादिल ।

Categorized in राष्ट्रिय