योङ्ग पिकासों कला व कलाकारतयेत सम्मान, सम्र्वद्धन व कला श्रृजनाया माध्यमपाखे आर्थिक थकायेगु छगु न्ह्याकूगु अभियान यानाच्वंगु खः ।

थुगु ज्याय् मदिक्क न्ह्याकाच्वम्ह  खः प्रवद्र्धक लिसे निर्देशक अजय देशार । योङ्ग पिकासों छगु ज्याझ्वः दथुइ चित्रकार श्याम ज्यापुया एकल पौभा चित्रकला ब्बज्या पाटन संग्रहालय याःगु खः। उगु ज्याझ्वःया उलेज्या नेपाःया लागि श्रीलंकाया राजदूत सुदर्शना पाथिरानां उलेज्या यानादीगु खः।

कलाकार ज्यापुं स्वंगु दशकनिसे च्वयादीगु तारा, बसुन्धरा, बज्रयोगिनी, वज्रवाराही आर्यतारा, लोकेश्वर द्यःया पौभा कला संग्रहालयय् ब्बज्या जुगु खः। राजदूत पाथिरानां नेपाः व श्रीलंकया सम्बन्ध सांस्कृतिक व ऐतिहासिक कथं न स्वानाच्वंगु दु धका धयादीगु खः। बुद्ध धर्म नाप तपिक स्वानाच्वंगु पौभा चित्र नेपाःया शान खः धका धयादीगु खः।

ग्वसाः खलः योङ्ग पिकासोया निर्देशक अजय देशारं नेपाःया मौलिक चित्रकला व पौभा चित्रकला महत्व तसकं दुगुलि थज्यागु ब्बज्या यानागु खः धका धयादीगु खः। वयकलं कलाकार तयेगु आर्थिक जीवन थकायेगु निति न थज्यागु ब्बज्यापाखे तसक महत्व दु धका धयादीगु खः।

उगु ब्बज्याय् चित्रकार ज्यापूं सिर्जना यागु ३२ गु पौभा चित्र न्ह्यब्बःगु खः।

Categorized in राष्ट्रिय