बागमती प्रदेश दुने सरकारी कामकाजया भाषा कथं नेपालभाषा व तामाङ भाषा कार्यान्वयन थौनिसे जुइगु दु। प्रधानमन्त्री पुष्पकमल दाहाल ‘प्रचण्ड’ थौ ‘बागमती प्रदेश सरकारी कामकाजया भाषा ऐन, २०८०’ न्ह्यागु घोषणा यानादीसे उगु भाषा सरकारी कामकाज कार्यान्वयनय् यायेगु धका घोषणा यानादीगु खः ।

थौ ‘भाषा दिवस २०८१’ न जुगुलि सरकारं निगु भाषायात सरकारी कामकाजय् कार्यान्वयन यायेगु धका घोषणा यानादीगु खः। थौ भाषा दिवसया लसताय् प्रदेश सरकारं प्रदेश दुने सार्वजनिक बिदा तक बिःगु खः । विसं २०८० कात्तिक २३ गते प्रदेश सरकारं उगु ऐन प्रमाणीकरण याःगु खः। प्रदेशया मुख्यमन्त्री शालिकराम जम्मकट्टेलया सभाध्यक्षताय् जुगु उगु ज्याझ्वलय् संस्कृति पर्यटन लिसे नागरिक उड्डयनमन्त्री हितबहादुर तामाङ, युवा लिसे खेलकुदमन्त्री विराजभक्त श्रेष्ठ नाप स्वनिगु संघीय सांसद व प्रदेश सांसदपिनिगु न ब्बति दुगु खः।

नेवा देव दबूया नायः पवित्र बज्राचार्यं बागमती प्रदेश सरकारं नेपालभाषा व तामाङ भाषायात सरकारी कामकाजय् हःगुलि लसकुस यानादीगु खः। वयकलं प्रधानमन्त्री दाहाल, बागमती प्रदेश सरकार, प्रदेशसभाया दक्को दुजः व  मुख्यमन्त्रीया कुतलं नेपालभाषा व तामाङ कामकाजया भाषाया कथं कार्यान्वयन जूगु खः धका धयादीसे ऐन कार्यान्वयनया लागि नियमावली, आयोग, अनुगमन समिति लगायत निकाय गठन याय् ल्यःदनिइ धका धयादीगु खः।

नेपाल तामाङ घेदुङया अध्यक्ष मोहन गोलें ताःईनिसे भाषाया निति थःपि गुलि सतकय् वया आन्दोलन याये मागु खँ लुमकादीसे थौ वया थःपिनिगु माग सम्बोधन जुगुलि लसता प्वकादील। व्यकलं आः हाकन थुकियात कार्यान्वयन यायेगुलि थःपिन्स माक्को कुतः यायेगु जुइ धका धयादीगु खः।

बागमती प्रदेश सरकारया संस्कृति पर्यटन लिसे सहकारीमन्त्री शैलेन्द्रमान बज्राचार्यं सहिदपिनिगु बलिदान लिपा वःगु सङ्घीय व्यवस्थाया उपलब्धि कथं थौया दिं झीसं लुमक्येमाः धका धयादीगु खः। उगु ज्याझ्वलय् प्रधानमन्त्री दाहालं जनकवि दुर्गालाल श्रेष्ठयात दोसल्ला न्ययेकाः हनादीगु खः।

थःगु नुँगः खँ तयेगु झ्वलय् जनकवि श्रेष्ठं थःम्हेसिया यक्को सतकय् वया सर्घष यानागु खँ कनादीसे व हे आन्दोलनपाखे आः थथे सम्मानित जुइ खना च्वनागु दु धका धयादीसे वयकलं थगु ल्यःदनिइगु जीवन न भाषिक आन्दोलनय् छ्यलिइगु जुइ धका बचं बियादीगु खः।

Categorized in राष्ट्रिय