२०८१ आषाढ ३०, आइतबार

इंग्ल्यान्ड युरो २०२४ या फाइनलय्

क्षितिज श्रेष्ठ | दिल्लाथ्व षष्ठी ११४४, असार २७ बिहीवाः

इन्जुरी टाइमय् ओली वाटकिन्सं याःगु गोलं नेदरल्यान्डयात २–१ गोलं बुकाः इंग्ल्यान्ड युरो २०२४ या फाइनलय् थ्यःगु दु।

निगूगु हाफय् सुपर सबया रुपय् मैदानय् दुहाँ वःम्ह वाटकिन्सं इन्जुरी इलय् न्हापांगु मिनेटय् निर्णायक गोल यानाः इंग्ल्यान्डयात लगातार निक्वःगु युरो फाइनलय् थ्यंकूगु खः।थ्व हे वइगु जुलाइ १४ गते बर्लिनय् जुइगु फाइनल कासाय् इंग्ल्यान्ड व स्पेन दथुइ कासा जुइगु दु। न्हापांगु सेमिफाइनलय् स्पेनं फ्रान्सयात बुकूगु खः।

कासाया ७ गु मिनेटय् हे जाभि सिमोनं गोल यासें डच टिमयात अग्रता बिउगु खः।अथेहे १८ गु मिनेटय् इंग्ल्यान्डया कप्तान ह्यारी केनं विवादित पेनाल्टीपाखें बराबरी गोल याःगु खः। नेदरल्यान्डया डेन्जेल डम्फ्रीजं पेनाल्टी बक्सय् केनयात फाउल यायेधुंकाः इंग्ल्यान्डं भिएआरया ग्वाहालिं पेनाल्टी काःगु खः । गुकी केनं छुं नं गल्ती मयासे गोल याःगु खः।

८१ गु मिनेटय् केनया थासय् मैदानय् दुहांवःम्ह वाटमिन्ट्सं कोल पाल्मरया पासपाखें गोल याःगु खः। कासाया ८१ गु मिनेटय् फिल फोडेनया थासय् पाल्मर नं मैदानय् दुहां वःगु खः।

Categorized in कासा