धर्मकीर्ति विहारया प्रमुख लिसें थेरवाद बौद्धधर्मया अतिकं नांजाःम्ह श्रद्धेय धम्मावती गुरुमांया नामं स्वास्थ्य उपचार कोष नीस्वंगु दु।

गुरुपुन्हीया दिं धम्मावती गुरुमांया ९१ दँया लसताय् लाकाः धर्मकीर्ति विहारय् स्वास्थ्य उपचार कोषया घोषणा यायेगु ज्या जूगु खः। क्षत्रपाति निःशुल्क चिकित्सालयया व्यवस्थापनय् धर्मकीर्ति विहारया ग्वसालय् उगु कोष न्ह्याकेगु कथं श्रद्धेय धम्मावती गुरुमां व क्षत्रपाति निःशुल्क चिकित्सालयया नायः डा. मनोजमान श्रेष्ठ निगूपक्षया दथुइ यायेगु ज्याखँया भ्वँतय् ल्हाःचिं तःगु खः।

धम्मावती गुरुमांपाखें कोष नीस्वनेगु नितिं झिगू लख तका तयाः बिज्याःगु खःसा उपासिका उपासकपाखें थ्यंमथ्यं झिंन्यागू लख दामं कोषया घोषणा ज्याझ्वः जूगु खः। उगु ज्याझ्वलय् श्रद्धेय धम्मावती गुरुमां नं थुगु स्वास्थ्य उपचार कोष बुद्धधर्मशासन बल्लाकाः यंकेगु नितिं धर्मकीर्ति विहारलिसें उगु विहारया न्यागू कचा विहारय् च्वनाः बिज्याइपिं गुरुमांपिन्त निःशुल्क स्वास्थ्य उपचार क्षत्रपाति निःशुल्क चिकित्सालयस याकेगु नितिं नीस्वनागु खँ कनाः बिज्याःगु खः।

वसपोल गुरुमां नं स्वास्थ्य दकले तःधंगु सम्पत्ति जूगुव शरिर गुगु नं इलय् स्यनेफूगुलिं थुकियात इलय् हे वाःचायेकाः वासः यायेगु नितिं थुगु कोषया आवश्यकता जूगु खँ कनाः बिज्याःगु खः।

ज्याझ्वलय् क्षत्रपाति निःशुल्क चिकित्सालयया नायः डा. मनोजमान श्रेष्ठं धम्मावती गुरुमांया नामं स्वास्थ्य उपचार कोष नीस्वंगुलिं उगु विहारयात सुभाय् देछासें चिकित्सालयं गुरुमांपिन्त निःशुल्क वासः यायेगु बचं बियादीगु खः। लिसें वय्कलं आर्थिक रुपं अतिकं विपन्न छेँजःपिं दुसा इमित नं निःशुल्क स्वास्थ्य उपचार यायेगु बचं बियादीगु खः।

Categorized in राष्ट्रिय