यल महानगरपालिका ३ वडाय् रोबर्ट बडापत्र न्ह्यागू दु। यलया मेयर चिरिबाबु महर्जनं उगु रोबर्ट बडापत्रया शुभारम्भ यानादिसें रोबर्ट बडापत्र खनाः थः अजूचाःगु खँ धयादीगु दु। सेवाग्राहीयात माःगु भ्वंया जानकारी न्यनेगु झ्वलय् रोबर्टं माःगु भ्वंया बारे लिसः बिउगु खनाः थः अजूचाःगु खँ मेयर महर्जनं धयादीगु खः।

वडां नकतिनि दयेकूगु व्यावसायिक सीप तालिम भवनया उलेज्या यायेगु झ्वलय् मेयर महर्जनं रोबर्टया शुभारम्भ यानादीगु खः। ज्याझ्वलय् न्ववाय्गु झ्वलय् मेयर महर्जनं यल महानगरपालिकाया ३ नम्बर वडा दकलय् अप्वः कर संकलन याइगु, डिजिटल प्रविधि लिसे सेवा प्रवाह सम्बन्धी न्हू न्हूगु सोच छ्यला वयाच्वंगु वडा यलया हे अब्बल वडा जूगु धासें मेगु वडायात पाठ सयेकाः व्यवहारय् छ्यलेत इनाप यानादीगु दु।

ज्याझ्वलय् राष्ट्रिय परीक्षा बोर्डया अध्यक्ष महाश्रम शर्मां वडां न्ह्याकूगु व्यावसायिक सीप तालिम केन्द्र शिक्षा लिसे सीपयात स्वायेगु राष्ट्रिय नीति दुगु खँ धयादीगु दु। उकथं हे पुलांम्ह स्वास्थ्य राज्यमन्त्री उमेश श्रेष्ठं शिक्षा, स्वास्थ्य व सेवा प्रवाहलय् यल महानगरपालिकाया ३ वडा देश्या हे अनुकरणीय जूगु खँ धयादीगु दु।

न्हू दयेकूगु भवनय् व्यावसायिक सीप स्यनेगुया लिसें छेँय् छ्यलिगु थीथी कथंया उपकरण दंगु भावय् मर्मत याइगु जानकारी वडा अध्यक्ष श्रीगोपाल महर्जनं बिउगु दु। भवनय् निगूगु तल्लाय् स्वास्थ्य क्लिनिक, स्वंगूगु तल्लाय् योग कक्षा सञ्चालन याइगु जूगु दु।

उकथं हे निगूगु तल्लाय् हे सरकारी अस्पतालया भावय् स्वास्थ्य सेवा बीगु जानकारी नं वडा अध्यक्ष महर्जनं बियादीगु दु।

Categorized in राष्ट्रिय