मौद्रिक नीति सार्वजनिक जुउगु न्हापागु दिं शेयर बजाः सच्छिगु ल्याखं थहावःगु दु।

शेयर बजाः परिसूचक नेप्से थौ १ सय १३ दशमलव ४२ ल्याखं थहावना २ हजार ६ सय ८१ दशमलव ५६ विन्दुइ थ्यःगु दु। नेप्से थौ २९ महिना लिपा दकलय् अप्पो थ्यःगु खः।

थ्व स्वया न्हापां २०७८ साल फागुन ११ गते शेयर बजाः २७ सय विन्दुइ थ्यःगु खः। बैंकिङ समूहया शेयर झन्डै १० प्रतिशतं थहावःगु दु। माइक्रोफाइनान्स बाहेक मेगु दक्को समूहया शेयर थहावंगु दु। १९ गु कम्पनीया शेयर १० प्रतिशतं थहावंगु दु सा दकलय् अप्पो वाणिज्य बैंकया शेयर थहावंगु दु।

समग्र बजाः थहावंसा थौ गणपति लघुवित्त वित्तीय संस्थाया शेयर झन्डै साढे ९ प्रतिशतं कुहावःगु दु। ४ करोड ३ लाख कित्ता शेयर १५ अर्ब ८१ करोड ५ लाख रुपैयाँया कारोबार जूगु दु। दकलय् अप्पो कुमारी बैंकया ३६ करोड १० लाख व एनआईसी एसिया बैंकया ३४ करोड ८१ लाख रुपैयाँयो शेयर कारोवार जूगु दु।

थौ निक्वः तक शेयर बजाः ’सर्किट ब्रेक’ जूया कारोबार बन्द जूगु खः। बजाः चाःगु छगु मिनेतय् नेप्से परिसूचक ४ प्रतिशतं थहावना न्हापागु सर्किट ब्रेक जूया कारोबार २० मिनेटय् स्थगित जूगु खः। २० मिनेट लिपा चाःगु बजाः हाकन छगू मिनेटय् ५ प्रतिशतं थहावना निक्वः तक सर्किट ब्रेक जूगु खः।

Categorized in राष्ट्रिय