किपूलि याक मिसायात स्वां देछाःगु दु । किपूली च्वम्ह ७३ दँ दुम्ह लक्ष्मीकुमारी महर्जन (याकः मिसा)यात बुगंद्यःया स्वां प्रसाद देछाःगु दु।

प्यन्हु न्ह्यः बुगंद्यः सालिइगु जुगुलि याक मिसायात स्वा बिइगु प्रचलन दुगु खः। लगंख्यलं जाह्वलाख्यः बुगंद्यः सालिइगु इलय् प्यन्हु न्ह्यः मू पुजारी (पानेजु) लाकां मन्ह्यास्ये किपूया प्यंगःथां तक वया याकः मिसायात स्वां छायेगु याना वयाच्वंगु खः।

याकः मिसायात बुगंद्यःया मतिना यानातम्ह मिसा कथं कयातःगु खः। बुगंद्यः थ्व हे वइगु साउन १७ गते रथ सालां जाह्वलाख्यलय् यंकीगु जूगु दु।

गुथि संस्थानं याकः मिसाया निंतिं वार्षिक ५ हजार ५५५ दक्षिणा दरबन्दि बिइगु याःगु दु। गुथि संस्थानं पिथंगु वक्तव्य कथं बुगंद्यःया रथ जात्रालिसे सम्बन्धित याकः मिसायात पानेजुं स्वां देछाइगु इलय् ज्याकुथिया प्रतिनिधि वनाः दक्षिण बिइगु खँ न्ह्यथनातःगु दु। गुथि संस्थानं निदँया नितिं १० प्रतिशतया दरं रकम अप्वयेकेगु नं जानकारी ब्यूगु दु।

Categorized in राष्ट्रिय