प्रधानमन्त्री केपी शर्मा ओलीं नेपाःया आर्थिक विकास व समृद्धिया नितिं थप प्रत्यक्ष विदेशी लगानीकर्ता दुथ्याका ग्वाहालि यायेत स्वीट्जरल्याण्डया सरकारयात इनाप याःगु दु।

प्रधानमन्त्री ओलीं नेपाःया नितिं स्वीट्जरल्याण्डया राजदूत ड्यानियल मेउली मोन्टेलोनलिसे नापलायेगु झ्वलय् थौं प्रधानमन्त्री निवास बालुवाटारय् झाःम्ह नेपाःया विकासया नितिं वैदेशिक ग्वाहालि छगू उत्प्रेरक जुइगु धयादिल। वय्कलं समावेशी लोकतान्त्रिक संरचनाया विकासया नितिं स्वीट्जरल्याण्डया अभ्यास स्थापित जूगु खँ न्ह्यथनादिसें नेपाः सरकारं लोकतन्त्रयात सुदृढ यानाः राज्य संरचनायात देय्या जनताया न्ह्यःने उत्तरदायी दयेकेगु कुतः यानाच्वंगु खँ कनादिल।

प्रधानमन्त्री ओलीं प्रत्यक्ष वैदेशिक लगानी अप्वयेकेत सरकारं माःगु सुधारात्मक कारवाही यायेगु प्रतिबद्धता प्वंकादिसें आः नकतिनि क्वचाःगु नेपाल लगानी सम्मेलनय् ५० गू देय्या उत्साहजनक सहभागिता जूगु टिप्पणी यानादीगु खः। नेपाःयात सन् २०२६ तक अविकसित देसं स्तरोन्नति यायेगु व सन् २०३० तक मध्यम आय दुगु देय् दयेकेगु आज्जु तःगुलिं वय्कलं विकास साझेदारपाखें थप सहकार्य जुइगु अपेक्षा प्वंकादीगु खः।

थुगु अवसरय् प्रधानमन्त्री ओलीं स्वीट्जरल्यान्ड सरकारयात नेपाःया विकासय् निरन्तर ग्वाहालि, कोभिड–१९ रोकथामय् ग्वाहालि व शान्ति प्रक्रियाय् सहकार्य व सद्भावया नितिं सुभाय् देछानादिल। राजदूत डैनियलं प्रधानमन्त्री ओलीया कार्यकाल सफल जुइमा धकाः भिंतुना व कामना यासें निगुलिं पक्षं आपसी हित व सहकार्य निरन्तरता बीगु आश्वासन बियादीगु खः।

प्रधानमन्त्री ओलीया मू निजी सचिव राजेश बज्राचार्यलिसें परराष्ट्र मन्त्रालयया पदाधिकारी लगायतया सहभागिता दुगु खः।

Categorized in राजनीति