संविधानं म्हमसिउगु जिल्ला प्रशासन कार्यालयं नेपालभाषाया संघसंस्था दर्ता याय्गु झ्वलय् नेवाः नां व नेपाल संवत तयातःगु संस्था दर्ता मयाय्गु यानाच्वंगु दु।

सिडिओ कार्यालयं संघसंस्थां तयाःगु नेवाः नां हिलेगु लिसे नेपाल संवत तयातःगु संस्था तकं दर्ता मयाय्गु नीति कयाच्वंगु सीदुगु दु। थ्वहे झ्वलय् येँया ओम बहाःया ‘ॐ बहाः त्वाः खलः मिसा पुचः’ दर्ता याय्गु वंगु झ्वलय् नेपाल संवत तयाः दर्ता याःगु खःसा दर्ता याय्त सिडिओ कार्यालय माने मजूगु खः।

संस्थाया लोगोय् नेपाल संवत तल धकाः सिडियो कार्यालयं नेपाल संवत लिकाया जक दर्ता याःगु खः। संस्थाया अध्यक्ष सजनी महर्जनया कथं न्हापा लोगोय् ‘विक्रम संवत् २०८१ व नेपाल संवत ११४४’ तयाः संस्था दर्ता याय्त स्वःगु खः। तर नेपाल संवत लिकयाः विक्रम संवत जक तयाः दर्ता याःगु खँ वय् कलं कनादीगु दु। नेवाः पत्रकार राष्ट्रिय दबूया सहसचिव सुनिता महर्जनं ॐ बहाःत्वाः खलः मिसा पुचः दर्ता मयाःगु खँयात कयाः सामाजिक सञ्जालय् तय्वं उकियात कयाः चर्चा परिचर्चा जूगु खःसा थ्व हे झ्वलय् दर्ता मजूगु थीथी संघसंस्था लहना वाःपौ यात थःपिनिगु संस्था दर्ता मजूगु जानकारी बिउगु खः। 

उकथं हे थ्व स्वयां न्ह्यः ‘हल्चोक आकाश भैरव समाज’ दर्ता याय्गु झ्वलय् नं लोगोय् ११४४ तयाः दर्ता याय्त स्वःगु खःसा नेपाल संवत लिकायेकाः विक्रम संवत २०८० तय्काः जक दर्ता याःगु खँ समाजया नायः शेरबहादुर पुतुवारं कनादीगु दु । वय्कलं नेपाल संवतयात सरकारी ज्याखय् छ्यलेगु धकाः संघीय सरकारं मान्यता बिउसां नं सिडिओ कार्यालयं सरकारं बिउगु मान्यतायात हे हाचां गाय्गु ज्या यानाच्वंगु द्वपं बियादीगु दु। लुमंके बहः जू सरकारं नेपाल संवतयात राष्ट्रिय संवत घोषणा याय्गुया लिसे सरकारया फुक्कं दस्तावेजय् नेपाल संवत छ्यलेगु निर्णय यानाः तत्कालीन प्रधानमन्त्री पुष्पकमल दाहालं च्वःगु पतिइ तकं नेपाल संवत छ्यःगु खः।

उकथं हे थीथी सरकारी निकायं तकं नेपाल संवतयात छ्यलाः पौ च्वय्गु ज्या न्ह्याकेधुंकूगु अवस्थाय् सिडिओ कार्यालयं थुकियात माने मयाय्गु ज्या गलत जूगु टिप्पणी नेवाः ख्यलय् जुयाच्वंगु दु। महर्जनया कथं थःपिसं नेपाल संवत तयाः छाय् संस्था दर्ता याय् मदइ धकाः प्रतिवाद यानागु खःसा सिडिओ कार्यालयया कर्मचारी नेपाल संवत तय्गु खःसा संस्था हे दर्ता मयाय्गु धकाः धायेवं थःपिं बाध्य जुयाः नेपाल संवत चीकाः संस्था दर्ता याय्त बाध्य जुइमाःगु खँ कनादीगु दु।

थ्व स्वयां न्ह्यः फसिगां भौमचा पुचः दर्ता याय्गु झ्वलय् नं सिडिओ कार्यालयं संस्था दर्ता याय्गु खःसा खँय् भासं भाय् हिउसा जक संस्था दर्ता याय्गु धायेवं थःपिनिगु मौलिकता हे तंकाः संस्था दर्ता याय् माःगु खँ संस्थाया सचिव उर्मिला महर्जनं कनादीगु दु । वय्कः पिसं संस्था दर्ता याय्गु झ्वलय् ‘फसिगां भौमचा पुचः’ दर्ता याय्त स्वःगु खःसा उकियात नां हिलेत बाध्य याकूगु खँ नं वय्कलं कनादीगु दु। संस्था दर्ता याय्गु झ्वलय् ‘फसिगां बुहारी समूह’ वयां लिपा ब्राकेटय् (फसिगां भौमचा पुचः) तय्काः जक संस्था दर्ता याःगु खः।

उकथं हे थ्व स्वयां न्ह्यः नेपालभाषाया संस्था ‘बाखं दबू’ दर्ता याय्त स्वःगु खःसा उकियात सिडिओ कार्यालयं अस्वीकार याय्वं थःपिसं बाखँ दबू दर्ता हे मयानागु खँ संस्थापक दुजः लोचनतारा तुलाधारं कनादीगु दु वय्कलं धयादिल, ‘जिपिसं बाखँ दबू दर्ता याय्त स्वयागु खः। तर सिडिओ कार्यालय बाखँ दबूया नां हिलाः ‘कथा दबू’ तःसा जक दर्ता ययोगु धकाः धायेवं जिमिसं दर्ता मयानागु खः।’ थ्वहे झ्वलय् थीथी सामाजिक सञ्जालय् गुगुल ट्रान्सलेटय् नेवारी तल धकाः विरोध यानाच्वंपिं नेवाःतय्सं धाःसा देशय् दुने दुगु थज्याःगु समस्या हे ज्यंके मफयाच्वंगु इलय् गुगुल ट्रान्सलेटरया खँ तयाः थवंथवय् विवाद याय्गु ज्या हे गलत जूगु टिप्पणी नं यानाच्वंगु दु।

Categorized in राष्ट्रिय