काभा मिसा भलिबल लिगय् नेपाः फाइनल थ्यःगु दु। थौ मंगलवाः इरानयात लगातार सेटय् ३–० सेटय् बुकाः भारतलिसेया उपाधि कासाया म्हितीइगु जूगु दु।

दशरथ रंगशालाय् कभर्ड हलय् थौ मंगलवाः जूगु सेमिफाइनल कासाय् नेपालं इरानयात २५–२१, २८–२६ व २५–२० या अन्तरं बुकूगु खः। लिग चरणय् वेस्ट अफ फाइभ म्हिताः पराजित जूगु नेपालं सेमिफाइनलय् इरानलिसे बदला काःगु खः। न्हापांगु सेटया सुरुइ ५–१ या ल्याखं लिउने लाःगु नेपालं लगातार ४ ल्याः हयाः ६–५ या ल्याखं न्ह्यःने लाःगु खः। वयां लिपा नेपालं अंक थप यानाः १६–१० या ल्याखय् थ्यंगु खः।

वयां लिपा छगू इलय् २०–२२ या ल्याखं थ्यंगु नेपालं कासाय् लिउने मलासे न्हापांगु सेट २५–२१ या ल्याखं त्याकूगु खः। निगूगु सेट सुरुइ हे इरानं २–० या न्ह्यने लाःगु खः । व धुंकाः नेपाः ६–४, १०–५ या न्ह्यन् लाःगु खः। तर छुं साधारण गल्ती यायेधुंकाः इरान हाकनं कासाय् लिहां वयाः २०–२० या स्तरय् थ्यंगु खः। वयां लिपा इरानं न्ह्यन् २४–२१ या ल्याखय् थ्यंगु खः।

वयां लिपा नेपालं लगातार ३ अंक थप यानाः २४–२४ या ल्याः दयेकूगु खः व धुंकाः निगुलिं टिमं पालंपाः अंक थप याःगु खःसा अन्ततः नेपालं लगातार २ अंक थप यानाः २८–२६ या ल्याखं निगूगु सेट त्याकूगु खः। स्वंगूगु सेटय् इरानं १०–७ या न्ह्यने लागु खः। नेपालं कासाय् लिहां वयाः १५–१५ या स्कोर दयेकूगु खः।

वया लिपा न्ह्यने २३–१९ या ल्याखं थ्यन। नेपालं थ्व सेट २५–२० त्याकूगु खः। लियाल्युया नितिं बुधवाः इरान व श्रीलंका दथुइ धेंधेंबल्ला जुइ।

Categorized in कासा