प्रधानमन्त्री केपी शर्मा ओलीं आः हलिमय न्हापा स्वया अप्पो शान्ति माः धका धयादीगु दु।

थौ श्रीघलय् धर्मकीर्ति बिहारय् दँच्छितक न्ह्यागू गृही विनय (गृहस्थ जीवन) सम्बन्धी प्रशिक्षणय् ताःलापि उपासक–उपासिकापिन्त दँसिपौ लःल्हानादी प्रधानमन्त्री ओलीं आः हलिमय शान्ति, करुणा, मानवता, स्नेह, ममता, दया व परोपकारभाव यक्को दुगु बुद्धया शिक्षायात थप सामयिक यायेमाः धका धयादीगु खः।

उगु प्रशिक्षणय् ६४ म्ह ताःलागु खः। बामलागु उन्माद, तं व दम्भया लँ त्वःता शालीनता, विनयशीलता, मानवनीयता व आत्मियभाव क्यनेत हलिमयय् शान्ति अप्पोकेगु व पृथ्वीया न सुरक्षा यायेफइ धका प्रधानमन्त्री ओलीं धयादीगु दु।

प्रधानमन्त्री ओलीं धयादीगु दु, “थौ हलिमयय् मानवीय उन्माद व स्वार्थप्रेरित व्यवहारया कारण अशान्ति जुयाच्वंगु दु। थःगु जिद्धीया लागि निर्दाेष मनूतय्त सूना गुगु न इलय् गन सशस्त्र हतियार प्रहार व प्रतिप्रहार याइगु धका भय दु। उकियात क्वचायकेत बुद्धया लँय् अनुशीलन उपयोगी जुइ।’’। वयकलं परस्पर बेमेल व अशान्ति यायेगु प्रवृत्ति मानवीय प्रवृत्ति मखुगुलि उकिइ विनास जक याइ धका वयकलं धयादीगु खः ।

ज्याझ्वलय् बिहारया प्रमुख धम्मवती गुरुमां न प्रधानमन्त्री ओलीया भिं उसाँय् नाप नेपाःयात बालागु लँय् यके फय्मा धका सुवाः न बियादीगु खः।उगु ज्याझ्वलय् प्रधानमन्त्री ओली नाप वयकःया जहान राधिका शाक्य व येँ महानगरपालिकाया उपप्रमुख सुनिता डङ्गोलपिनिगु न ब्बति दुगु खः।

Categorized in राष्ट्रिय