भुपेन्द्रमान शाक्यया न्हूगु म्ये “नुगःया खँ”या म्युजिक भिडियो सोमवाः येँया सीटीसी मलय् पितब्वज्या जुगु दु।

भुपेन्द्रमान शाक्य व रत्नशोभा महर्जनं हालादीगु उगु म्येय् सुरेन्द्र श्रेष्ठया संगीत व संयोजनय् चण्डेश्वर महर्जनया च्वयादीगु खः। अथे हे उगु म्ये नाप भुपेन्द्रमान शाक्यया हे सलय् खस नेपाली भाषाया ‘मधुर बचनले गर सत्कर्म’ बोलया भजन नं पिदंगु खः।

निपुं हे म्ये सुरेन्द्र श्रेष्ठं संगीतबद्ध यानादीगु खः।पितब्वज्या ज्याझ्वलय् डा.निकि शाक्यं लसकुस नुगःखँ व म्येहालामि भुपेन्द्रमान शाक्यं सुभाय् नुगःखँ तयादिल।ज्याझ्वलय् म्युजिक भिडियो निर्देशक विश्वास बज्राचार्य, संगीतकार सुरेन्द्र श्रेष्ठ, म्येच्वमि मध्ये नेवाः म्येया चण्डेश्वर महर्जन व खस् नेपाली भायया म्येया शंकर ज्वालापिन्सं नं नुगःखँ तयादीगु खः।

निपुं हे म्येया बिषयलय् वरिष्ठ सिनेपत्रकार बिजयरत्न असंबरें समालोचना यानादीगु खःसा ज्याझ्वयलय् लेजेण्डरी सिंगर जुजुकाजी रंजित मू पाहाँ कथं झायादीगु खः।

अमोधवीर बज्राचार्य व राष्ट्रिका शाक्य नापनापं मचा कलाकार डेजी बज्राचार्यपिन्सं अभिनय यानातःगु खः। छायाँकन व सम्पादन आकृष्ट शाक्यं यानादीगु दु। म्येया कोरियोग्राफी उपाशना शाक्य व म्येया निर्माण अन्नपुर्ण तुलाधर शाक्यं यानादीगु खः।

Categorized in मनोरन्जन