इटालियन क्लब अटालान्टायात २–० गोलं बुकाः स्पेनिस रियल म्याड्रिडं युइएफए सुपरकप त्याकूगु दु।

पोल्याण्डया वारसा राष्ट्रिय रंगशालाय् म्हिगः बहनी जूगु कासाय् रियलया लागि फेडरिक भल्भेर्डे व लिएन एमबाप्पें छगू छगू गोल याःगु खः। न्हापांगु हाफय् अटालान्टां रियलयात गोल मजुसे बराबरीइ जुयाच्वंगु खःसा निगूगु हाफय् धाःसा रियलं निगू गोल याःगु खः।

५८ गु मिनेटय् फेडरिकं भिनिसियस जुनियरया पासयात गोल यासें रियलयात न्ह्यने यकूगु खः। ६८ गु मिनेटय् जुड बेलिङ्घमया पासय् एमबाप्पें रियलया अग्रता दोब्बर याःगु खः।

छुं ई न्ह्यः रियललिसे सम्झौता याःम्ह एमबाप्पें रियलया डेब्यु कासाय् छगू गोल याःगु खःसा वं उपाधिलिसें रियलया यात्रा न्ह्याकूगु खः। एमबाप्पें थ्व थःगु नितिं तःधंगु क्षण जूगु व ताःई न्ह्यःनिसें थ्व क्षणयात पियाच्वनागु धका धाःगु दु। रियलं युइएफए सुपरकपया रिकर्ड खुक्वःगु उपाधि त्याकूगु खः।

थ्व स्वया न्ह्यः रियल व बार्सिलोनां न्याक्वः तक उपाधि त्याके धुकुगु खः। आः रियल दकलय् अप्वः युइएफए सुपर कप त्याकूगु टिम जूगु दु। रियलं थ्वसिबें न्ह्यः सन् २००२, २०१४, २०१६, २०१७ व २०२२ य् युइएफए सुपरकप त्याके धुकूगु दु।

Categorized in कासा