प्रधानमन्त्री केपी शर्मा ओलीं थौ सुथय् निघौ राष्ट्रिय मिसा भलिबल टिमनाप खल्हाबल्हा याःगु दु। प्रधानमन्त्री ओली, कासाया प्रशिक्षक नाप कासामिपि नाप आः तक याःगु उपलब्धि, थप पूर्वाधार विकास व वयत्यःगु अन्तर्राष्ट्रिय कासाय् नेपालं गुकथं त्याके फइ धइगु विषय सहलह याःगु दु।

प्रधानमन्त्री निवास, बालुवाटारय् ब्रेकफास्टनाप देशया कार्यकारी प्रमुखनाप थ्व हे न्हापां खँ ल्हाय् दया थःपि तसक लय्तागु दु धका नेतृत्वकर्ता, प्रशिक्षक व कासामिपिन्स धाःगु दु। प्रधानमन्त्री ओलीनाप सहलह यायेगु झ्वलय् टिमया मुख्य प्रशिक्षक जगदीश भट्ट, कप्तान अरुणा शाही, नेपाल भलिबल सङ्घया अध्यक्ष जितेन्द्र चन्द, कासामि सरस्वती चौधरीपिनिगु ब्बति दुगु खः।

प्रधानमन्त्री ओलीं निवाः न्ह्यः जूगु ‘काभा वुमन्स नेसन्स भलिबल कासा’ स्वयत थः वये मास्तिवःगु खःसा मन्त्रिपरिषदया आकस्मिक बैठक जुगुलि वये मफुगु धासे कासामिपिनिगु प्रगति, चाहना व मागबारे थः जानकार दु धका धयादीगु खः। प्रधानमन्त्री ओलीं कासाया उपविजेता कासामिपिन्त नेपाल सरकारं म्हतिइ स्वंगू लाख बिइगु निर्णय जुगु धका जानकारी बियादीगु खःसा कासामिपिन्स उकिया निति सुभाय् देछानादीगु खः। वयकलं थुगु कासाया बिकास यायेगु निति अन्तर्राष्ट्रियस्तरया कभर्ड हल दयेकेगु सङ्कल्प यानादीगु खः।

“छिकपिन्सं स्यूकि सरकारया ढुकुुटीइ यक्को ध्यवा मदु अय्न जिमिसं याये माःगु ज्या यायेगु जुइ। वइगु कासा त्याकेगु जुइ उकिइ छिकपिन्के मनोबल दु, व साकार जुइमाः।’’, प्रधानमन्त्री ओलीं धयादीगु दु, “झिसं कासा म्हितीइगु धइगु  त्याकेगु निति खः, उकिइ बालाक्क ध्यान बिया त्याकेगु भलसा कया झाँस। पक्का न त्याइ।’’

प्रधानमन्त्री ओलीं वंगु छु दिं न्ह्यः नेपालय् दुपि रसियाली मिसा भलिबल कासामिपि नापलायेगु झ्वलय् थःत नेपाली टिमया प्रशंसा याःगु लुमका विश्वस्तरया कासामिपिन्स याःगु प्रशंसां नेपाःया मिसा भलिबल टिमया सम्भावना दु धका धयादीगु खः।

Categorized in कासा