१४ सय दँ पुलागु न्यकू जात्रा मतयाः (दीपयात्रा) यलय् थौ तःजिक हंगु दु

दँय् दँसं भदौ कृष्ण द्वितीया साया जात्राया कन्ह्य कुन्हु थुगु जात्रा हनिइगु याइ। थुगु जात्राय् बौद्ध नाप हिन्दु धर्मावलम्बीपिन्स यलया प्यंगू अशोक स्तूपनाप थीथी विहार, महाविहार, चैत्य, नाप द्यःया चाःहिलिइगु याइ। द्यःया थाय् धूप, मत, कपूर, ध्यवा, मह्रि छायेगु याइ।

न्यकू जात्रा–मतयालय् गुलि थः मदुपिनिगु नामय् मत च्याकिइगु याइ। थुगु जात्राया निति यलय् झीगु थासय् च्वंपिन्स पालंपाः यायेगु याइसा थुगु दँय् नकबहीःया पाः लागु दु।नकबहीः, मंगः, चक्रबहीः, इखाछे, नागबहाः बुबहाः, हौगः, वकुबहाः, इखालखु, कोबहाः व सौगः याना झीगु त्वाः मिले जूया जात्रा व्यवस्थापन व बाजं प्रशिक्षण बिइगु याइ। यलया जुगु सिद्धिनरसिंह मल्लया पालं निसे थथे जात्रा जुया वयाच्वंगु धका धायेगु याइ।

थुगु जात्राय् नवबाजा धिमे, नाय्खिं, क्वँचाखिं, मगःखिं, नगरा, ढोलक, मृदङ, झाँक्री बाजं, जोरानगरा, दह ब्याबाजं, खँजरी, दबदत, धाः, दमोखिं, नेकू, तिक्ली व पय्ताखिं बाजं थायेगु याइ। थुगु बाजं मध्ये धाः, न्यकू, दमोखिं, प्रमुख खःसा न्यकू बाजं थाइगुलि न्यकू जात्रा धायेगु न याः।

Categorized in राष्ट्रिय