शेयर बजाः थौ भचा थहावःगु दु। न्हिच्छियक थहाकुहा वंगुलि शेयर बजाः परिसूचक नेप्से २ दशमलव ११ ल्याखं थहावना २ हजार ९ सय ६८ दशमलव ४४ विन्दुइ थ्यःगु दु।

थौ बजाः चाःगु ४ मिनेटय् नेप्से ३ हजार २ विन्दुइ थ्यना बन्द जुइगु इलय् तक भचा कुहावःगु खः। बैंकिङ, विकास बैंक, फाइनान्स, लगानी व मेमेगु बाहेक दक्को समूहया शेयर कुहावःगुलि बीमा, व्यापार, होटल समूहया शेयर तसकं थहावःगु दु।

कर्पाेरेट विकास बैंक, सिन्धु विकास बैंक, रिलायन्स फाइनान्स, दोल्ती पावर कम्पनी व मल्टिपर्पाेज फाइनान्स कम्पनीया शेयर १० प्रतिशतं थहावःगु दु। बजाः सामान्य थहावःगु दिं कर्णाली विकास बैंक समूहया शेयर धाःसा १० प्रतिशतं कुहावःगु दु।

थौ कारोबार रकम धाःसा कुहावःगु दु। वंगु आइतपाः झन्डै २९ अर्ब रुपैयाँ बराबरया कारोबार जूगुलि थौ ३ सय ३७ गु कम्पनीया ४ करोड १४ लाख कित्ता शेयर १८ अर्ब ९० करोड तकाया शेयर न्यायेगु मिइगु जूगु दु।

Categorized in राष्ट्रिय