भारतीय क्रिकेटर शिखर धवनं घरेलु नाप अन्तर्राष्ट्रिय क्रिकेटपाखे सन्यास कयागु धका घोषणा याःगु दु। धवनं थौ सामाजिक सञ्जालपाखे सन्यासया घोषणा याःगु खः।

धवनं सामाजिक सञ्जालय् भारतया निति ताःईनिसे कासा म्हिता च्वनागु खः धका धासे लसतां हे त्वःत्येतिनगु खः धका धाःगु दु। धवनं दकलय् लिपा सन् २०२२ य् भारतया निति एक दिवसीय कासा म्हितूगु खः। शुभमन गिल व मेमेपि ल्याय्म्हतयेस बालाक्क कासा म्हितूगुलि टिमय् दुमथ्याःगु खः।

धवनें ३४ टेस्ट व १६७ गु एक दिवसीय व ६८ गु टी–२० अन्तर्राष्ट्रिय कासा म्हित्ये धुकुगु दु। एक दिवसीय कासाय् ६ हजार ७ सय ९३ रन व टेस्टय् ५८ पारिइ २ हजार ३ सय १५ रन दयके धुकुम्ह धवनं टेस्ट डेब्युलय् दकलय् कम बलय् शतक दयकूगु कीर्तिमान तक तःगु खः।

मोहालीइ अस्ट्रेलिया नाप जूगु डेब्यु कासाय् ८५ बलय् शतक दयकूगु खः। एक दिवसीय क्रिकेटय् ५ हजार स्वया अप्पो रन दयके धुकुगुम्ह च्याम्ह ब्याटरय् धवन न छम्ह खः।

Categorized in कासा